自Whatsapp話要update佢哋個T&C之後，呢兩日喺Facebook被WEME嘅Add me link/QR code同Signal洗晒版咁滯，都係嘅，由以前ICQ年代，至MSN世界，再之後嘅Whatsapp，到可能成主流嘅Signal；情況同歷代股王一樣，由從前嘅百業之母、國際銀行界嘅滙控(00005)，到時裝王國思捷(00330)，再發展至電訊世界嘅中移(00941)，然後踏入網絡科技嘅騰訊(00700)，大家都係一齊見證住唔同板塊嘅時代變遷啫。
依家10點17分，喺聊天室上今早戰況都真係比較激烈，事關由收咗U盤至開市後大約五分鐘，就係制訂當日<追揸沽策略>嘅時間，唔覺意路經隻李寧(02331)破位(老老實實我知內需係hit，但李寧喺輪證界得16隻Call，無Put更無牛熊，咁冷門嘅嘢我真係甚少理佢)，於是快手捉隻Call出嚟，睇睇戰友們能唔能夠把握時機啦。
睇返大市走勢，今朝恒指開市升172點，報28408點。喺五分鐘圖上見到SlowSTC(14,3)由此前嘅超賣位出發向上回升，本以為佢踩返入熊證第一層街貨後會違反地心吸力，繼續向上殺肥熊，誰不知喺五分鐘圖上第二支燭高位都係28408點，係呀，晨早流流就出咗個「平頂」啦；如是者一回就回咗100點，依家見恒指五分鐘圖靠住條保歷加通道中軸游走，而SlowSTC(14,3)就喺中軸橫行。
恒指咁嘅樣真係唔搞好過搞，於是從個股埋手。內險股呢兩日升得係威係勢，尤其是N個月前(其實好似係上個月月中)捉過嘅國壽(02628)，及至平保(02318)前日都見有「大陽燭」出現，噚日再搭多支「十字星」，今日就麻煩啦，出咗支陰燭出嚟，截至依家10點49分計，今日嘅高位高過噚日，而今日嘅低位低過噚日，「穿頭破腳」出現；再加埋今日暫時高位$102.7，噚日就係$102.6，爭一毫子都算係「平頂」，只係SlowSTC(14,3)仲未見轉勢咁解。
又轉個小時圖八掛(呢期唔知點解愛上咗個小時圖)，高位出咗粒高開低收嘅實心陽燭後，再嚟多支同樣咁上下七嘅陰燭向下走，10小時線(1 x 10線)已經跌穿，SlowSTC(14,3)都明確下行。又試下等唔等到佢五分鐘圖見超買，見至先至出隻平安熊(50110)，收回價$105，離現價約5.69%，槓桿比率約14.19倍，呢一注都係睇定啲好，話晒我都有開平保淡倉失手嘅record。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon：輪證贏家
秒投聊天室：輪證教室
