噚日恒指都真係幾升得,朝早揀咗隻恒指牛(64275)出嚟,上半場未完先食一轉,至下半場大紎1點40分至2點正,見恒指五分鐘圖條SlowSTC(14,3)再次落到超賣範圍,而今次嘅位置仲比朝早嗰轉更加低;再加上喺五分鐘圖上見恒指有條250分鐘線(5 x 50線)支持住,喺噚日嘅[下半part]都有講過,如果未攞頭彩嘅可以趁呢個時侯可以再嚟多轉(64275),按當時(64275)高低位做過$0.078/$0.073計,平均買入價為$0.0755。
其後恒指再次回升,情況就好似朝早嗰時咁,恒指發力再上並再創當日新高,最高見過27502點。睇返恒指其實由2點30分至3點25分,SlowSTC(14,3)都係處於超買至嚴重超買水平,按呢段時間(64275)高低位做過$0.082/$0.076,平均沽貨價為$0.079,即係話第二轉都有4.6%落袋,計埋朝早嘅話就一成有多啦。
依家9點48分,恒指今早開市跌191點,報27281點,至依家跌幅已經擴大至227點,做緊27244點,五分鐘圖上見恒指目前有27200點支持住,同步SlowSTC(14,3)都落到接近超賣水平,不過,細心睇個走勢圖,就會發現其實指數喺度橫行緊;喺未知恒指想點之前,都係向個股埋手先。
同恒指兩生花嘅騰訊(00700),今朝早做完U盤之後,見到五分鐘圖上條SlowSTC(14,3)超賣水平比恒指還要低,聊天室嘅戰友就唔駛講,二話不說地走入;至於目前所見騰訊跌幅大為收窄,而五分鐘圖SlowSTC(14,3)已經回升至超賣至中軸水平,呢個moment逼巴士逼上隻騰訊牛(65394),收回價$553.2,同現價有近3%差距,似乎有啲遲。
唔緊要,好嘢係要比多啲耐性,試下今日之內會唔會有多一轉機會等到。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon:輪證贏家
秒投聊天室:輪證教室