今朝起身睇電視見到條直簽話美股首次升上30000點水平，同步見右下角日經升緊500幾點，心諗隻中移(00941)牛(56658)今日仲唔肥？呢鑊唔駛我嗌 #阿姨我不想努力了，我自己做埋阿姨都仲得。(我知我諗多咗)
到恒指表演啦，9點20分開市報26819點，升231點；再到正式開市後10分鐘，就見恒指最高爬到26996點，以呢口價計熊證首三層街貨全數死亡，呢度有相當於2159張期指，而最貼價層26900至26999點都有成930張期指，但以截至依家10點27分恒指高位仍然26996點計，呢層雖然未叫做正式死晒，但都分別唔大，索性用27000至27099點呢層為最貼價層就算，而呢層有相當於997張期指。
再睇返隻中移，佢今日堅係再「動」，今朝開市後一度衝上暫時高位$48.1，不過5分鐘圖上SlowSTC(14,3)未見上到超買範圍，就算去到依家10點29分，SlowSTC(14,3)依然都係處於中軸至初踩入超買水平，按(56658)現價$0.051同噚日平均買入價$0.046比，都叫做有一成水平落袋，即使唔落牛，換噚日[下半part]出嘅Call(16200)，見(16200)輪價比噚日升5.9%，唔貪心之下收割都不成問題。
再睇返中移日線圖，今日再彈但高位原來就被條10天線($48.11)頂住，怪不得再上唔到啦；都係嗰句：唔貪心嘅話收工算數。
猶記得近呢幾日[輪證贏家]同[下半part]先後推過中移、港交所(00388)(噚日食咗，唔緊要，無人會次次都賺盡嘅)同滙控(00005)，尚未動力嘅就係隻滙控。
截至依家10點46分，滙控最高見$42.95，5分鐘圖條SlowSTC(14,3)今朝裂口高開之後到依家先見回落，只可惜SlowSTC(14,3)回但股價唔會；留意返日線圖SlowSTC(14,3)仍處於嚴重超買位，唔通隻石獅開咗光之後係唔同啲？繼續觀察住先。
《施政報告》仲有10分鐘就開始，「林鄭出嚟講親嘢個市都會跌」呢個連我家老爺都知嘅都市傳說，唔知今日靈唔靈啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
