熱門:

2020年11月12日 港股直擊 即巿股評

【盤房來料】新經濟股政策風險升 但長線仍跑贏舊經濟股

隔晚美股個別發展,科技股反擊,納指反彈逾2%,港股情況差不多,恒指先升後回,恒科技反彈較為顯著,半日反彈3.7%。恒指今早高開182點,甫開曾升233點,高見26460,逼近周二高位26474點,但其後乏力回軟,倒跌最多145點,見26081點半日低位。恒指中午收市跌104點,報26122點,成交額1008.94億元。國企指數報10569點,升28點;恒指科指半日反彈278點,報7743。

話咗舊經濟股係咪扭轉長期弱勢言之尚早,友邦(01299)見完高位今日回吐4%,大笨象(00005)早早講咗40樓上嘅蟹貨,當造過陽澄湖加埋太湖,中移動(00941)半日亦跌近3%,總之一句,整個經濟結構改變咗係事實,新經濟取代舊經濟股,成為投資組合嘅核心,即使近日政策風險令新經濟股經常打冷震,但長遠嚟講,必定係新經濟股跑贏。

經過兩日雙十一購物節特價,今日科網股反彈,騰訊(00700)今日公布季績,通常都係收咗市之後,但股價先反彈5.4%,其實內地剛出台嘅反壟斷法,幾乎所有大行觀點都係騰訊喺眾多科網巨企中影響最少,而大部份大行所畀嘅目標價都係600樓上,中間位大約係650左右,若然今次份成績表見得人,股價要重返600水平無難度。至於其他平台股都反彈,有分拆概念嘅京東(09618)半日彈8%,尋日落到300水平,係重要支持位,守得到今日彈得快。美團(03690)亦彈近8%,由於明日係恒指服務公司季檢,上次失落藍籌嘅美團,今次被納入呼聲甚高,對股價帶嚟短線刺激。阿里(09988)自從螞蟻上市被DQ後,又得罪阿爺,短期難有運行,今日彈力相對亦無咁勁,有時博反彈都要揀啱對象,尋日風聲鶴唳之際要博反彈,JATMX幾隻揀,阿里係最唔值博嘅。

教育股今日突然落鑊,板塊內股份閒閒地升一成最低消費,阿Man上星期曾畀貼士付費問股嘅粉絲,可以收集新高教(02001),啱啱一個星期就進帳超過一成,絕對有晒交代。不過都係嗰句,急升係食糊套利唔係追貨,本來無一股嘅,咪見急升去多手追貨,高追唔係惹塵埃,係會惹輸錢嘅禍。

麥狄文

(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads