的確，噚日個市實在太悶啦，有人會唔覺意將噚日買落嘅貨過咗夜，但亦都有人被個市磨得太悶而選擇喺收市前沽清；但有誰會知道噚晚輝瑞爆單咁震撼股市嘅新聞呢？眼見美股盤前係咁上過千點，到10點半一堆message橫飛，主要都係話道指裂口升過千點，甚至有讀者喺FB留言話「恒指牛(66468)過晚夜分分鐘升一倍」；時也命也，錢到唔到你袋有時都唔係你可以控制到。
今朝新聞報番噚晚美股嘅盛況，發現納指好似斯人獨憔悴，Well，有肺炎新藥喎，仲駛同你封城又居家令咩，難怪今朝啲科技股謝皮；不過咁，對於一班想上車/翻兜/追多注嘅科網粉嚟講，話唔定呢個係佢哋落場嘅好機會。
唔搞個股住，先睇恒指牛熊證街貨先。今日恒指開市報26400點以上，首三層熊證街貨全數死亡，呢度夾埋有相當於1339張期指，最貼價層上移至26400至26499點。
截至依家10點11分止，恒指高開低走後升幅又上返少少，做緊26363點，升346點，以現價計就算今日恒指牛最貼收回價上返去25600至26599點呢度，但其實恒指都係靠近熊證街貨層，且熊證再上26500至26599點就已經到重貨區，有相當於840張期指。齋睇呢個街貨圖，追牛再上殺熊是常識吧！
不過，又望望恒指日線圖，計埋今日嘅裂口，由11月初至今恒指已經生咗四個裂口出嚟，噚晚都有喺聊天室度講過，根據裂口理論(Gap Theory)，第一個叫突破性裂口，第二個為持續性裂口，第三個打後就係損耗性裂口，去到第三個打後時，其實再出現嘅裂口已經係屬於市場上好友嘅過度消費，你見今日日線圖SlowSTC(14,3)都已經明顯耷頭就知；當然無人話過裂口係一定要補，但絕大多數嘅情況之下都會補回，只係有拖無欠。
以目前恒指走勢，的確隨時有下行可能，只係佢會唔會再向上咬多啖熊證啫。
「咁咪即係技術分析VS街貨圖？」係呀，買就更係買街貨贏啦，因為佢往績勁呀嘛；不過依家呢個技術圖都真係唔係講玩笑，我都係自己同自己玩算啦。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
