今朝起身開電視睇新聞，見到新聞下方橫向走字出咗利物浦2:0(唔記得咗個名)，我大嗌：老爺~利物浦贏波喎~，刷緊牙嘅佢好淡淡然咁放開口裡面支牙刷，再同我講：我知呀！「一定係我無買佢，所以佢贏波，你做乜唔話比我知噚晚有利物浦呀？」「因為我想你身體好，所以唔好買利物浦」er...人哋諗住將個招牌改做「輪證贏波」添...。
睇返個市，依家10點16分，噚日仲擔心緊阿里巴巴(09988)條10天線會變成支持定阻力之時，今日一個唔該就彈起咗，連同佢班friend騰訊(00700)、美團(03690)同京東(09618)一開市就搶高晒，騰訊上市至今見第二次$600都不遠已，阿里同京東應該係「雙11」之餘，前者仲有螞蟻；今朝新聞都訪問證券行，話有客叫夠18歲嘅屋企人即刻開戶；以前就話夠18歲就入紙申請公屋，依家夠18歲就要去開證券戶口，咩香港？
唉，今日個市真心難玩，喺聊天室出完恒牛再收再出，又點騰訊牛，但都好似仲未見有似樣嘅走勢出現，一搞就搞到依家11點4分，恒指跌幅收窄至90點，做緊24696點，如果今朝10點轉恒指牛唔係怕指數唔同SlowSTC(14,3)一齊走，依家都應該可以安安落落完成一注，算，日日都玩到咁就真係無人會返工啦。
拉遠少少睇恒指日線圖，雖然早兩日出咗「黃金交叉」，但恒指今日第二日下行，SlowSTC(14,3)喺日線圖上都處於超買位，而%K線向下跌穿%D線，只係今日低位暫時被50天線(24564點)支持住，望望月曆聽日就結，唔通聽日借騰訊一下彈高上$600順便推個市一把，做返靚少少？都係下晏再算，反正就算做騰訊DT依家見佢5分鐘圖上到保歷加通道頂，就算入騰訊牛(64175)，收回價$550，同現價有7%，但都要等佢回返落嚟先至有度到有無靚位入，然後再衝上去。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/IG/Patreon/秒投聊天室：輪證贏家
