噚日同我家老爺落樓下老茶鋸完個鐵板後(佢鋸,我只係食個似疑學生餐嘅晚餐),收到message話螞蟻集團落實聽日(即今日)開始IPO,連個stock code都有埋。本身螞蟻上市呢單嘢已經係今年IPO重頭戲,依家入場費$4XXX一手,入10手都只係$4XXXX,街坊價到咁,全城又有乜可能唔谷爆佢?「同期有iBond喎...」iBond有計得數,政府要做一人一手,今批最多增到$150億,假設今批同以往一樣有50萬人認購的話,最多每人比你兩至三手;By the way,iBond向來都係玩人海戰述,又係全家總動員嘅時候啦!
上個星期放低咗恒指一牛一Call,睇返恒指5分鐘圖,上星期五(10月23日)的確喺5分鐘圖上見到SlowSTC(14,3)落到超賣水平,不過喺下晝2點5分至2點20分,睇返上個星期五【輪證下半Part】出文時間為下晝2點54分先喺Facebook出文,咁你話當唔當有買入先?
依家10點43分,恒指低開後有兩下爭扎,不過後來就二話不說地向下跌,暫時最低見過24699點,未到牛證第一層街貨24500至24599點,但都非常接近。喺聊天室同室友們邊吹水邊一齊見住恒指無力向上,捉到5分鐘圖保歷加中軸第一次唔過即出極高槓桿恒指熊,第二次再見恒指5分鐘圖保歷加再抽到上中軸,差啲嚇死寶寶時又被我畫到個「雙頂」,於是大家坐定定等恒指瀡落到,不久之前大家齊齊收割,perfect!
反轉頭睇恒指日線圖,雖然10天線(24615點)正式上穿50天線(24573點),即上個星期預計嘅「黃金交叉」已經出現咗,手多畫兩條線喺日線圖上,就畫咗條「上升通道」出嚟;不過,SlowSTC(14,3)%K線於高位跌穿%D線,而今日暫時見嘅陰燭,kick住咗喺條100天線(24744點),以10點53分現價係已經無埋添。左右為難,都係抽螞蟻算。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/IG/Patreon/秒投聊天室:輪證贏家