噚日喺【輪證贏家】同大家講咗喺Patreon開多咗一個平台，暫定不定期會upload一啲同輪證相關嘅教學/基礎文章，So far係得三個人，但喺一個資訊「default free」嘅地方裡真係有人願意課金，呢一種被認同嘅感覺，真係好重要，好多謝你哋認為文字有價。
如果有Like到【輪證贏家】FB嘅讀者，應該都知道一個連祖雲達斯係球隊，而不是人名嘅我(雖然我上年已經update咗呢部份嘅知識，係囉，就係上年先知囉)膽粗粗走去買咗噚晚車仔贏波。今朝我問我老家爺咩環境時，佢答我和波...係喎，喺股票市場裡面只係得贏同輸；但喺體育世界裡面，除咗贏同輸之外，仲有打和架喎，是但啦，反正今朝都被老爺笑到痴呆，我決定再斥巨資，買佢最鍾意嘅利物浦，燈死佢。
今朝早終於都無塞車，不過唔知係咪又就嚟有個風，落街等巴士時大風到想上返樓攞件大褸落街。喺巴士上聊天室室友們早已蒲頭，今朝恒指開升126點，報24695點，到正式開市後恒指二話不說就彈上去，截至依家10點29分止，恒指最高做過24903點，換言之熊證首三層街貨全數死亡，最貼價層推高至24900至24999點，呢度有相當於926張期指，捉即市嘅室友就更係紛紛出反手啦，但由於同25000至25099點過千張期指重貨太近，所以都只夠偷位，最終大家都成功偷到幾格，最勁嘅仲偷到15格。
依家10點48分，恒指已經由高位低走中，就乃念25000至25099點過千張期指熊證街貨，吼低入牛或者勝算比高位出熊大啲；恒指牛(65334)，收回價24200點，同現價有逾600點差距，槓桿成43倍，僅限DT。
至於噚日bookmark咗嘅石藥(01093)，下晝續。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/Patreon/秒投聊天室：輪證贏家
