噚日喺恒指跌500點嘅時候,公司pantry CEO珠姐悄悄地放低咗件佢親手做嘅馬豆糕喺我檯面,當我發現嘅時候,只係見到珠姐嘅背影,連一句「多謝」都嚟唔切,或者連佢都feel我嗰剎那我好忙。
今朝恒指微升35點,開市報24194點,叫做踩住牛證第一層街貨。到正式開市時彈高過百點,截至依家10點16分止,恒指最高見過24368點,升210點。從5分鐘圖所見,恒指保歷加通道口仍然拓闊中,只係SlowSTC(14,3)兩線上到接近90水平,所以聊天室都有唔少室友早已開定淡倉,捉即日市下行。
坦白講,今日開淡倉都唔係一件錯事,事關喺日線圖上見恒指出咗「黃昏之星」,且SlowSTC(14,3)明顯勢頭向下;再加上按目前恒指牛熊證街貨圖所見,即使依家恒指彈咗200點,但現價仍然靠近牛證街貨範圍。又或者今日嘅陽燭,只係一條預測「下降通道」中嘅一粒陽燭嚟架啫,咁諗住先啦。
依家10點22分,恒指5分鐘圖上仍然見大市貼近保歷加通道頂部運行,而SlowSTC(14,3)進一步攀升至90嚴重超買範圍,只係隨住保歷加通道口拓闊嘅原因,就算上到呢個嚴重超買範圍,都怕會出現超買再超買,都係等SlowSTC(14,3)%K線向下跌穿%D線,下行勢確認之後先至小注落場。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/秒投聊天室:輪證贏家