噚日下晝仲心存希望滙控(00005)出現錘頭,結果真係出咗,仲由陰燭變陽燭,速度快過方太煮餸,由於時間關係,今日滙控再隨市下行,或者慶幸嘅係佢今日不如恒指般直插。
噚日喺聊天室最後放低話可以小注一試恒指熊,最終有三位美貎+智慧+勇氣並重嘅女士同爸爸落場,結果今朝呢三位今日隻恒指熊應該肥過林雪(我好鍾意雪雪架!)
依家10點1分,恒指愈殺愈有,首兩層肥牛街貨已經全線陣亡,呢兩層夾埋有相當於2610張期指,截至依家為止恒指最低見過23325點,換言之目前所謂最貼價層23300至23399點都可以當佢無到,而呢度有相當於1873張期指,計埋今朝殺咗嘅,即係有4483張期指完成任務。又變相最貼價牛證街貨層為23200至23299點,唔好失望,呢度都有1265張期指坐鎮,但去到依家呢個moment仲有幾多仲呢度死守中?不得而知。
至於熊證,最貼價為24300至24399點,呢度都有成1073張期指架,不過同現價有成1000點差距,遠過嫦娥奔月。
睇返恒指日線圖,其實由9月初開始恒指跌穿咗「中期上升通道」後,反手築起「下降通道」,早幾日都好似有畫過,應該係星期一(9月21日)就係嗰支大陰燭嗰日,由「下降通道」頂向下打至接近「下降通道」底部,其後呢三日接力行埋落到個底部啫。
依家再睇SlowSTC(14,3)兩線已經落到個位數嘅嚴重超賣水平,而恒指連續第三日跌穿保歷加通道底以外範圍,不過保歷加底有拓闊跡象,或者恒指仲需要多一兩日時間慢落到底部之後先至會跌停,然後再隨「下降通道」底向上彈返上去,望望月曆下個星期四(10月1日)咪就係國慶?喂!件事有無咁巧合呀?
恒指熊(52450),收回價24100點,同現價有逾700點,槓桿比率約25.41倍,同一收回價中最高,吼恒指5分鐘圖SlowSTC(14,3)見超買時小注落場,唔駛等到國慶前走,day trade得架啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/秒投聊天室:輪證贏家