今日坐我左邊嘅Designer Ken大拿拿40大壽,為此小妹特意喺阿布泰度斥巨資$4.5買咗一包2020年9月23日到期嘅極度末日薯片(哈哈哈!好好食架!),仲有由唔知邊個partner送嘅梨一個(好甜架!噚日你無返工,我喺你嗰位食咗半個!)。
噚日上半場走左隻恒指熊(50004),都好彩喺下半場再入到恒指熊(50116)。唔貪心見噚日入咗之後,喺下晝3點35分至收市前,恒指5分鐘圖SlowSTC(14,3)全程處嚴重超賣水平,呢段時間真係任何一個位走都問題不大,按呢段時間(50116)高低位做過$0.096/$0.086,平均沽價貨為$0.091,同噚日嘅平均買入價$0.082比,賺幅為11%。當然啦如果揸到今朝,喺恒指開市無幾耐連殺兩層牛證街貨時先走嘅話,賺幅唔止咁少。
依家10點9分,恒指今日嘅跌勢比噚日冷靜,先睇牛熊證街貨圖,見首兩層牛證街貨已被收回,呢兩層夾埋有相當於1994張期指,而最貼價層進一步下行至23700至23799點,呢度有相當於1734張期指。其實再向下數多兩層熊證街貨,都係有過千張期指喺度,如果由上個星期五(9月18日)一直手持熊證至今,都咪話唔肥,吼恒指5分鐘圖SlowSTC(14,3)上到超買位開淡倉似乎仍是首選策略,恒指熊(51312),收回價24328點,同現價有近470點差距,市場上最貼價嘅熊證之中槓桿最高,咁嘅條款當然適合做day trade啦。
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
FB/秒投聊天室:輪證贏家