今朝起身開電視見到ticker話依家黃雨，我望望窗，同啱啱起身嘅老爺講：邊度有雨啫？唔駛1分鐘個天就「Boom~」，之後就「嘩啦嘩啦」...我錯啦，好彩返工嗰段時間唔係好大雨啫。
依家10點20分，可能落雨所以條街有啲塞，塞到返嚟再開晒機、斟埋水，恒指都高開完再下行返落去，依家做緊24691點，升101點，5分鐘圖上恒指抽高後就沿保歷加上升通道運行，至於SlowSTC(14,3)就處於50至70中軸至超買位置，對用Swing trade嚟講係極之不利嘅水平。
睇返恒指日線圖，以暫時高開低走嘅情況，恒指見實心陽燭，雖然噚日10天線跌穿20天線同100天線，出咗兩個「死亡交叉」，不過，下方50天線(25156點)似乎可以成為恒指嘅彈床，同步見日線SlowSTC(14,3)落到超賣水平，假設彈床有力張恒指彈返上去，咁SlowSTC(14,3)就完成一次鐘擺；但見恒指牛熊街貨圖，24300至24399點嗰堆1256張期指真係咁易就放過？以我認識嘅大戶雖然未至於十惡不赦，但亦非一般善男言女，為咗落少兩層地獄就做呢啲小恩小惠？嘿，真係搵鬼信！
至於睇咗幾日嘅平保(02318)，今日再見日線圖SlowSTC(14,3)%K線已明顯升穿%D線，就連14RSI勢頭都呈上，走勢圖上見今日一彈已彈返入保歷加通道裡面，唯一問題就係條100天線($81.166)會唔會成為阻力擋住。平保牛(63944)，收回價$70，就等今日5分鐘圖見SlowSTC(14,3)落到超賣時，小注試水溫先。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
