由於疫情嘅關係，我呢個定期捐血者今次都遲咗接近一個月先上紅十字會，上個星期五(9月4日)收工後終於都捨得死過去apm，捐過血嘅都知道每次都要上磅，對上一次上佢嗰磅已經係4月底嘅事，今次再上竟然輕咗大拿拿3磅！男士可能對呢3磅無乜反應，不過對於女士嚟講，Let's party！(而我只係每日用最懶嘅方法做咗10分鐘運動啫，都叫做有付出過)
依家10點15分，恒指跌完升過再跌返，依家報24680點，跌15點，開恒指5分鐘圖見今日好似無方向，睇返今日牛熊證街貨圖，牛熊兩邊都無新增街貨增，而牛熊中間價為(25100+24499)/2=24799.5點，以截至依家為止恒指點數大部份時間都處於中間位至近牛街貨範圍，而牛證第二層街貨24300至24399點仲有成過張期指喺度，唔通同上個星期一樣，去到重貨唔食或食得嗰少少，玩輕食？
老實講呢期恒指的確難玩，睇返睇咗幾日嘅平保(02318)，日線圖見今日終於SlowSTC(14,3)落到嚴重超賣水平之餘，%K線低位升穿%D線，走勢圖上以截至依家低位$79.85計，係跌穿過保歷加通道底部($80.216)，而同步見14RSI勢頭亦呈上，而保歷加通道口拓闊中，依家只係擔心100天線($81.128)會唔會變成大阻力啫。
下晝再睇平保。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
