雖然上周五美股表現牛皮，而侵侵喺頒令要求TikTok喺90日內出售TikTok美國業務，表面上係有所退讓，延長咗TikTok出售美國業務時間，但代表美國有意放過中國科企，侵侵已表示下一個制裁對象有可能係阿里巴巴(09988)，阿里雖成為藍籌新貴，但股價逆市下跌，斯人獨憔悴。不過內地股市做好。帶動港股再升，創超過三星期高位。
恒指今早高開29點，開市後曾倒跌19點，其後喺A股帶動下回升，半日最高升340點。見25523點半日高位。中午恒指報收25505點，升322點；國指則報收10450點，升184點；恒生科技指數中午收報7101點，升62點。
市場焦點集中喺上周五恒指服務公司季度檢討結果嘅換馬股，阿里順利染藍，可惜公司隨時成為被美國針對目標，半日股價跌0.6%。至於另一被納入恒指成份股嘅藥明生物(02269)半日升5.5%，公司將於今日公布業績。小米(01810)砌低美團(03690)成為首隻晉身藍籌嘅w股，由於之前股價表現一直落後，今日一口氣升7.4%，企穩16元之上，若然今日收市能企穩16.5元，短線重上水面，見番17元招股價難度唔大。美團大熱倒灶，只得國指成份股呢個安慰獎，唔少缸邊友以為今日美團凶多吉少，早段股價曾低見209元，但其後倒升，中午收市前倒升1%。今早阿Man 表示美團即使短期受壓，長遠計入藍籌係遲早嘅事，家下股價下跌分分鐘係個上車靚位。
入到藍籌未必升，被趕出藍籌大家庭嘅信置(00083)及中國旺旺(00151)跌逾2%，但一向質地麻麻嘅神華(01088)半日竟升1.2%。至於被踢出國指嘅國藥(01099)及中信証券(06030)上升，只有比亞迪下跌。
中資金融股係今動大市向上挑戰25500水平嘅功臣，內險股升勢尤其強勁，內險領漲大市，國壽(02628)飆5.2%；平保(02318)升3.4%；新華保險(01336)飆7%；太平(00966)升5.9%；人保(01339)升3.8%。A股造好，除咗內險股水漲船高，內地券商股亦全線做好，不過阿Man領教過內地券商股縮起上嚟嗰種恐怖，受過教訓打死唔高追。
之前阿Man提過康希諾(06185)有軍方背景，集團旗下夥拍軍科院軍事醫學研究院，研製嘅肺炎疫苗已獲批專利，並進入最後臨床測試階段，刺激股價半日急彈14%。公司亦1獲納入恒生綜合指數，令唔少缸邊友以為康希諾好快可以晉身「港股通」。阿Man覺得有乜要提醒大家，納入恒生綜合指數，係加入港股通嘅其中有個條件，可以話係攞到港股通入場券，不過加入港股通最終仍要由深滬兩地交易所確認，同時所有未錄得盈利嘅B仔，即係生化科技B股，係要甩咗個B先有資格入「港股通」。大家唔好以為上周五獲納入恒生綜合指數嗰32隻股份，會全部排隊入港股通，要留意B仔股幾時甩B，而康希諾係未甩B嘅，加上公司研發疫苗呢個消息，由3月中開始炒到依家，股價由80元起步炒至5月高位280元水平，股價升咗三個開有多，仲值唔值得追入，聰明嘅你唔使人提啦！
麥狄文
(徐狄怡‧證監會持牌人)
