噚日隻恒指牛(61083)確實係唔抵，但實在難敵大市瘋狂下插後再慢慢吽返上去呢種折磨，有時侯嚴守策略也難敵心理受壓，始終都係人嚟架啫，你估我係神咩？係嘅話唔駛返工啦。
依家9點7分，恒指做緊U盤，唔理佢住，睇咗恒指牛熊證街貨圖先。
今日恒指牛熊證街貨圖兩邊都無新增街貨，熊證最貼價層為25200至25299點，有相當於343張期指；而重貨區就係接住落嗰層，即25300至25399點，呢度有相當於859張期指。
至於牛證方面，最貼價層為24600至24699點，有相當於244張期指；重貨區就禾味啦，有1550張期指架，但就係喺第五層，即24200至24299點。如果要大市向下殺落呢個位嘅話，就連依家日線圖上所見嘅保歷加通道底部(24328點)都要穿埋，要去到100天線(24264點)呢啲位先識得停。
反正又未夠鐘開市，又咁啱開咗恒指日線圖就再望下啦，星期一(8月3日)恒指低見24250點後反彈，至噚日彈到上20天線樓上但未能企穩，且10天線已跌穿50天線，發出「死亡交叉」訊號，即使日線圖上雖見「早晨之星」屬利好，但暫時都只能望噚日嘅一粒陰燭只係接下嚟嘅升勢其中一部份。
依家9點27分，恒指開市報24909點，跌21點；到正式開市之後，恒指二話不說向下插，至依家9點38分，喺5分鐘圖上SlowSTC(14,3)已經由今朝開市時處超買水平回落至超賣至準備進入嚴重超賣。
恒指牛(56799)，收回價24188，同現價(9點49分mark24,784)有約600點差距，37.7倍槓桿亦適合Day Trade，一如以往等5分鐘圖上SlowSTC(14,3)落至超賣位時進場，唔貪心，博你挨返上25000點都收工。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
FB/秒投聊天室：輪證贏家
