熱門:

2020年6月4日 港股直擊 即巿股評

【輪證贏家】再追牛要且戰且走

噚日出咗去開完個會之後,就同我舊舊舊上司食tea,開開心心傾咗差唔多兩個鐘之後就一齊坐車返屋企(我同佢都住得好近),多謝你個tea,Veron,食完甜嘢個人真係會好啲。

噚日揀咗隻恒指牛(51311)出嚟,主要原因都係因為見恒指現價靠近熊證街貨層,同埋熊證街貨夠重,不過下半場恒指點數幾橫行,而SlowSTC(14,3)期間亦都無上過超買位,又一鋪焗住過夜。

今朝睇新聞講緊美國黑人被警察跪頸致死,涉事警員改控二級謀殺,望到右下角日經粒數報緊升逾200幾點,心諗隻(51311)應該都有啲希望。喺巴士坐緊車返公司時,見到恒指升逾318點,開市報24643點,雖然同步見5分鐘圖SlowSTC(14,3)未上到嚴重超買水平,但見(51311)開市報$0.103,真係拿拿聲開定a/c沽貨。按開市首15分鐘(51311)高低位做過$0.103/$0.088,平均賣出價為$0.0785,即平均賺幅為21.6%。

同同事圍爐吹完水之後,再睇返個市,依家10點20分,恒指做緊24382點,升幅收窄至升56點,日線圖上暫呈高開低走,目前水平進一步接近保歷加通道頂部(24924點),同步SlowSTC(14,3)亦向超買及嚴重超買水平出發。

睇埋恒指牛熊證街貨圖,今朝恒指再升多300幾點,暫時高見24643點,已經將首三層熊證街貨全數殺清,而目前最貼價為24600至24699點,呢度有相當於579張期指;至於重貨區就喺25000至25099點,有相當於1625張期指。

至於牛證方面,最貼價層為23300至23399點,呢度有相當於552張期指,係牛證街貨層中最多街貨新增嘅一層,都反映咗資金追升嘅情況,但以目前見牛熊街貨比例為24:76,始終流入淡倉嘅佔多數。

其實繼續追住熊證街貨嚟打嘅話係可以嘅,但問題係未必如前兩日咁安心去追,事關恒指日線圖上SlowSTC(14,3)已經開始進入超買水平,一來預咗再上嘅點數會再少啲,二來要開始有定隨時掉頭嘅準備。恒指牛(51389),收回價23384點,同現價有逾1000點差距,屬市場上第二高槓桿牛證,重點係低街貨。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads