熱門:

2020年6月3日 港股直擊 即巿股評

【盤房來料】期指連爆三裂口 係時候要抖一抖

雖然美國多地仍繼續有示威活動,但美股似乎無視呢啲負面因素,隔晚再上升,納指更進一步逼近歷史高位,只差2%之距,而標指已較3月低位累計回升四成。投資者着眼喺全球經濟活動重啟,國際貿易局勢暫時穩定,市場憧憬復甦,加上全球央行放水,令市場資金充裕,投資者情緒偏向樂觀積極。不過中美關係其實仍然緊張,要小心提防大市隨時出現回馬槍。

港股連續三日上升,恒指高開307點,已重返24000水平之上,亦順利回補5月22日所遺下嘅下跌裂口頂部,早段最多升368點,見24364點半日高位,亦係近兩星期高位。其後升幅曾收窄至224點,見半日低位24219點。中午恒指報收24283點,升287點;國指則報收24283點,升287點。值得留意係期指已經連續三日裂口高開,技術走勢上,通常第三個裂口被視為消耗性裂口,即係短期嘅購買力已接近耗盡,即使唔回調,嚟度呢度都要抖抖。而港股暫時就喺24300水平附近上落,有冇機會落去回補裂口唔知,但今日仲想好似早兩日咁挾到尾,似乎可能性唔大。

睇吓重磅股表現,更加覺得港股嚟到呢個水平要抖抖,眼見一直落後嘅友邦(01299)裂口高開,重上70元水平,而其他保險股都上升,即係最落後嘅板塊都起動,唔排除呢一下反彈已相當接近終點。差不多嘅情況亦發生喺ATM三股身上,領先嘅美團(03690)仍然升唔停,再破頂創160.7元上市後新高,半日再升逾8%,不過呢期較為落後嘅阿里巴巴(09988)裂口高開,亦一口氣升逾4%,半日報收208.8元,連最落後嘅阿里巴巴都起動,不得不提防。而騰訊(00700)更加倒跌,半日高位437.4元,又係去到440元前回頭,暫時已連續兩日開出陰燭,本來一直領先嘅騰訊,亦要抖氣。

不過以勢輪勢,港股暫時保持上升格局,無謂逆市操作多手做淡,即使大市要抖抖,亦唔代表要掉頭回落。尤其係牛熊證街貨比例以熊證居多,大戶又點會放過屠熊機會,唔排除大市喺24000水平呢度先拉鋸,咁嘅情況都係炒股唔炒市穩陣。

中國汽車工業協會估計,5月汽車銷量增近12%,汽車股今日有資金追捧,只係唔少汽車股呢兩日一彈,又再逼近反彈阻力,而汽車股普遍唔少蟹貨喺街,博反彈未宜太樂觀。如果真係要揀呢個板塊嘅股份嚟博,不妨睇呀升破頂嘅中升控股(00881),剛獲大行提升目標價,破頂股無障礙,追入先訂止蝕,現價買跌穿39.6止蝕,參考大行目標,有條件升至45至50元水平。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads