受到新冠肺炎疫情影響，今屆DSE考生無啦啦要捱多一個月開考前嘅壓力；終於今日都開考，人生第一個公開試嘅壓力真係非同小可，不過DSE絕對唔係人生嘅全部，放鬆心情反而有時會做得更好，加油！
其實同炒家落場都係一樣，有時太過緊張反而做唔到正確嘅選擇；當然都唔係話乜都唔理就得啦，冷靜啲、細心啲，就會發現到走勢圖上有唔同嘅訊號發出，適時做適當嘅決定，都可以幫到你喺做買賣時嘅表現。
就好似噚日咁，見恒指又彈返上條20天線，於是喺朝早就揀咗隻恒指牛(65872)落場。喺朝早10點30分至10點55分見恒指5分鐘圖SlowSTC(14,3)落返去超賣區時小注入場，按當時(65872)高低位$0.077/$0.07，平均買入價為$0.0735。
期後雖然見到SlowSTC(14,3)回升，但上行斜度同指數回升嘅速度唔係好跟，於是就係跟住SlowSTC(14,3)上到去超買位時，拿拿聲將隻(65872)沽走，按當時高低位做過$0.079/$0.078，平均賣出價為$0.0785，執雞執咗五格總好過倒輸收場。
坦白講呢期指數方向實在太難捉摸，噚日喺[下半part]忽然醒覺可以用界內證做部署；說實話界內證上場到依家，喺市場上都仲未喺好熱門，咁好大機會係市場對呢隻產品未有「信心」。
依家10點10分，恒指跌緊113點，報23864點。日線圖上恒指今日掛咗喺條20天線(23815點)之上，亦即係保歷加通道中軸。
睇埋牛熊證街貨圖，今日見牛證有新街貨層出現，最貼價上移至23700至23799點，有相當於22張期指；至於熊證最貼價層為24100至24199點，呢度有相當於287張期指。而牛熊街貨中間價為(24100+23799)/2=23949.5點，同現價(10點14分見23866點計)，兩者相差83.5點，其實同企喺中間位置無乜分別。
返番去睇恒指日線圖，形態上其實恒指以「一浪高於一浪」上行，但去到最近呢三個交易日恒指同條「升軌」有啲甩甩地，與此同時保歷加通道口有收窄嘅跡象，換言之恒指走動嘅空間唔多，就算用高槓桿輪證去做trade的話，一來可能得百零點水位；二來如果真係只係得百零點水位，基本上恒指要行嘅話可以喺幾分鐘內完全，即時間上或要再花多少少心機先得。
既然如此，就索性用界內證去框位條恒指算。恒指界(47982)，上限價為27000點，下限價為22000點，屬價內界內證，中間價24500點，較保歷加通道頂(24658點)稍為低啲啲，明顯以保歷加通道頂為目標；一旦走勢繼續行，且失守保歷加通道底(22975點)就應止蝕。
作者阿珊，任財經/投資版傳媒人十幾年，《鐘擺戰略贏港股》作者。用技術分析專心玩輪證，唔貪心，志在搵餐下午茶。
電郵：[email protected]；FB：輪證贏家
