熱門:

2020年4月22日 港股直擊 即巿股評

【盤房來料】醫網股set好止賺價繼續坐落去

紐約5月期油完成結算,死者已矣,但6月期油並未有停落嚟,隔晚紐約6月期油跌勢持續,油市繼續大幅波動,拖累美國股市再度急挫,幸而美股期貨喺亞洲時段先低後回升,令港股低開後跌幅收窄。

恒指低開253點後,一度跌310點,見23483點半日低位,創4月6日以嚟新低,其後跌幅收窄至99點,見半日高位23694點,可惜受制20日線(23721),未能進一步收窄跌幅。恒指中午報收23659點,跌133點;國指半日則報收9583點,跌31點。

油價未能止瀉,一日庫存唔減少,倉儲問題未解決,油價易跌難升,石油股跟相關產品都係避之則吉。今日石油股沽壓持續,中石油(00857)半日跌3.3%,藍籌股中跑第尾。中海油(00883)跟中石化(00386)分別跌2.1%及1.6%。唔係阿Man馬後炮,一直以嚟阿Man都唔睇好油價,自從貿易戰爆發,內地經濟可能放緩,阿Man已一再強調石油股碰不得,油價亦唔睇好。再加埋今年嘅肺炎疫情,令經濟下滑,市場對石油需求大減,今年油價亦唔會有運行。加上近日油價因為更多投機炒家參與,以及ETF產品令期油市場大幅波動,石油股以及相關產品,連博反彈都唔使諗。

雖然阿Man曾講過要博短炒油價反彈,寧願博原油ETF,但見識過期油結算轉倉,可以令期油價跌至負數,再經過隔晚ETF無啦啦出通造搬龍門之後,基本上呢類產品可以完全不理。加上油價呢三幾個月好難有起色,三星原油ETF(03175)單係轉倉差價都蝕死,半日股價狂跌近五成,創上市後近低。其實除咗呢隻ETF命在旦夕就死得,聽聞有證券行客仔,因為賭輸5月紐約期油,補唔切孖展被強制斬倉,戶口穿晒窿,未知欠數能否追得番,唔知落嚟會有幾多金融機構面對類似情況。油價呢鋪咁插水,睇嚟都好大鑊,油企、金融機構同時受影響。

至於阿Man一直睇好嘅新經濟股,今日以遠程醫療股表現最突出,一對醫網股孖寶平安好醫生(01833)及阿里健康(00241)雙雙破頂,有貨當然繼續坐定定,前者止賺位提高至105元,後者則將止賺位set喺17元。另一個突出板塊係輕資產股物管股,唔少龍頭創新高,同樣係坐得安心舒服嘅板塊。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads