熱門:

2020年4月1日 港股直擊 即巿股評

【輪證贏家】滙控30蚊不是夢?

今朝早出咗單大新聞,都應該係滙控(00005)同渣打(02888)係今年唔派息,「作為長情股東,今日愚人節對匯控很失望」呢個感受相信唔止我whatsapp另一端、我師兄一個人feel到,佢仲話「乜都好,失望...股價唔見咗一半,因派息高先留」,跟手佢再補多句「過橋抽板...對小股東唔公道」,佢將佢嗰份由傷心到失望(甚至係絕望),再轉至嬲嬲豬嘅感受完全表露無遺,我亦都完全感受得到。

Well,作為後輩嘅我,只能夠輕輕安慰佢「咁佢都係被動啫」(感覺上呢句嘢好似安慰第二樣嘢都適用);唔通你想我話「今日愚人節,have fun!」咁咩。

睇返滙控同渣打股價,截至9點56分止,兩股分別報41.4元同41.3元,跌6.2%及4.4%。留意返滙控最低暫時見過39.8元,最多跌近一成,已經有唔少口痕友話「滙控30蚊不是夢」,如果真係發生嘅話,咁就真係回帶去返青姐嗰滴眼淚、世紀供股嘅股價。

望返滙控股價圖,今日大裂口下行都已經係預咗,本身股價都處於五條平均線之下,今日仲穿埋條保歷加通道底($41.21),所有技術指標都轉晒軚,發出看淡訊號,唯一一條係呈上,不過都真係唔慌好嘢,就係條DMI嘅ADX,係呀,股價下行先嚟升,即係話今鋪嘅跌勢確實唔嘢少。

轉睇5分鐘圖,今朝早滙控向下急跌近一成後,至今跌幅已告收窄,唯於10點21分再睇,SlowSTC(14,3)上到40都無就再度掉頭,反映沽壓都唔細,怕且都要睇吓$40呢個位有幾多支持;一旦失守上唔返,Put輪、熊證都真係唔會同你客氣。

不過,要留意嘅係由於滙控係恒指重磅股之一,宣布暫停派息,係會對滙控同恒指相關輪證價格帶來影響,因為輪商發行輪證時,都已經根據過往派息歷史,將預期嘅股息計算落窩輪價格入面,依家唔派咁就同發行商發行相關輪證時出現落差,呢一樣嘢要留意。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads