熱門:

2020年3月27日 港股直擊 即巿股評

【輪證贏家】恒指真係上望24000點?

噚日成功Day trade咗隻恒指牛(61363),怕嘅係唔知美股會發生咩事;到夜晚美國公布上周首次申領失業救濟人數急增至328.3萬,為歴來最多,遠高於市場預期,講緊呢粒數係比上次公布嘅多咗10倍!朋友whatsapp group即刻彈出message:今晚美股有難啦。

朋友有呢個諗法真係一啲都唔出奇,只係一個好直線嘅諗法;誰不知美股高開,最後道指又升逾1300點收市。今朝睇返啲新聞,話因為憧憬美國國會會通過2萬億美元嘅振興方案,同埋聯儲局主席鮑威爾話會保證有足夠彈藥應付經濟需要。是但啦,股市上原因唔重要,結果先重要。

依家9點27分,仲有3分鐘正式開市,恒指就梗係隨外圍造好,開市彈416點,報23768點,換言之第一層熊證街貨23600至23699點未開市先死,呢度有相當於76張期指。23700至23799點變成最貼價熊證街貨層,有相當於148張期指,不過都應該凍過水。

搭正9點30分啦,但都係睇埋牛證嗰邊先,最貼價牛證街貨為23000至23099點,同開市價比有700點差距。風水果然係輪流轉,之前大跌市個市就算出現技術反彈,都彈唔到近熊證街貨,如果無咩事嘅話,應該都唔會高開完400幾點之後倒轉頭向下衝700點嚟殺第一層牛證街貨,為嗰12張期指做咁多嘢?係嘅話真係出黑人問號。

坦白講,開市聽到有聲音話恒指有機會挑戰24000點關口。依家9點34分,啱啱開咗市4分鐘,暫時見恒指都仲好似未瞓醒咁,不過,按照過去咁多次面對大市悶局或者技術分析同街貨圖成背馳嘅情況,確係10次有9次點都係街貨圖會贏,都係嗰句:街貨唔打靶,用嚟對沖嘅期指唔沽出,都係無錢入袋;你同我都要開飯,大行食嘅更加大啖,恒指牛(63090),收回價22818點,同現價(9點40分mark23686點)有868點差距,27倍槓桿應該做day trade不錯,一如以往,吼5分鐘SlowSTC(14,3)見超賣時小注落場,day trade為上。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads