熱門:

2020年1月15日 港股直擊 即巿股評

【盤房來料】大市趁貿談消息回調整固

中美貿易協議首階料可順利簽署,不過美國財長已表明,對華關稅將會維持至達成第二階段貿易協議,加上有傳聞指美國政府將擴大對華為供貨限制,道指期貨偏軟。與此同時,接二連三配股消息亦影響大市氣氛,港股借機回調。

恒指高開5點,早段曾升87點,見過半日高點28972點,兩萬九關噚日得而復失後,今日此關攻下不,大市掉頭向下,最多跌266點,見過半日低位28619點。中午接近低位收市,恒指半日報收28638點,跌246點;國指則報收11270點,跌84點。

藍籌重磅股普遍受壓,騰訊(00700)跌0.8%,失守400元,之前阿Man都係以400元為反彈目標,如今目標已達, 而港股升抵現水平有機會進行整固,有貨喺手先食糊套現,過番個肥年都係正路。阿Man愛股之一嘅友邦(01299)半日跌1.6%,同樣友邦亦已升至88元目標價,同樣短炒嘅先食糊無壞,仍然持貨嘅不妨用20日線作止賺參考,即係83元左右。其他重磅藍籌股普遍回軟,估計呢幾日重磅股將隨大市回調。

第二輪全國帶量採購將於1月17日在上海開標,市場料降價幅度可能會低於50%,醫藥股個別發展。對於兩隻龍頭股,石藥(01093)跟中生製藥(01177)雖然半日各跌2%,但中長線仍睇好,長氣都講多次,回調可能係低吸機會。

隨住大市累積一定升幅,唔少公司開始趁成交暢旺配股抽水,今日抽水股份唔少,當中錦欣生殖(01951)大手上板價為10.68元,但股價半日反而升5.6%,睇嚟呢批股份已盡入強中手。其實錦欣生殖有其獨特性,長線嚟講係唔錯選擇。至於其他配股股份普遍受壓。物管股一直得到大行加持,未理大市回調繼續高走,留意相關板塊估值便宜不再,現價再高追值博率大減,都係等回調先考慮。

話咗今年科技股繼續係焦點,今日輪到金山軟件(03888)發力,半日勁升11.5%,連升五日,同系小米(01810)亦升1.4%,其他新經濟股雖見回調,但回調就係吸納好機會,阿Man呢期都係望實阿里巴巴(09988),215元應該守得住,落到嗰啲位可以考慮上車。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads