熱門:

2019年12月13日 港股直擊 即巿股評

【盤房來料】港股重上250線 仍有力挑戰二萬八

今日好消息一大堆,包括中美貿易談判,首階段協議落實在即,只欠雙方大筆一揮,而更有消息指,美國除咗取消原定於本周日向1560億美元中國進口貨加徵額外關稅外,原有對華已徵關稅或減半。另一邊廂,米字旗國大選,保守黨報捷,料可取得過半數議席,有助國會順利通過脫歐協議草案,英鎊急升創逾半年高位。隔晚歐美股市均做好,美股三大指數中,納指跟標指再創收市新高,帶動港股今早裂口高開。

恒指裂口高開500點,開市重返250日線之上,雖然於250日線曾爭持,一度升幅收窄至411點,見27405點半日低位,但其後又見買盤湧入,250日線總算企穩,盤中曾高見27564點,升570點。中午恒指報收27551點,接近半日高位,升557點;國指亦升180點,報收10794點。半日成交額接近600億元,都算有啲睇頭,希望今日成交額能突破千億元。

藍籌重磅股普遍上升,騰訊(00700)半日升2.5%,為交投最活躍股份,成功回補8月初所遺下嘅355至360元裂口,不過對上仍有一個裂口喺362至370元,預計喺360元前需要整固,冇咁容易一步登天。另外兩大巨頭大笨象(00005)及友邦(01299)分別升2.5%及3%,大笨象終重見60元水平,呢兩日有報告唱好,純睇圖表61至62元有阻力,如能突破成功轉勢。至於友邦阻力位喺84元,不過重上80元已初步轉勢。呢三隻巨無霸已為恒指貢獻逾200點升幅。

噚日有消息指下周習大大到訪澳門慶祝當地回歸20周年期間,將宣布多項新政策,以促進澳門經濟多樣化,噚日已有資金追捧濠賭股。市場憧憬澳門及橫琴進一步整合,而銀娛(00027)喺橫琴坐擁土地,未來係一個可發掘寶藏。其他博彩股當然亦受惠,阿Man除睇好銀娛之外,都係盡量揀番啲無外資參與嘅濠賭股好啲,話就話中美貿易談判發展理想,但始終首階段協議達成後,後面仲有好長條路要行,有美資參與嘅公司,隨時喺談判期間會被用作人質。所以除咗銀娛之外,揀番新濠(00200)會好啲。

之前阿Man喺信報《金融街密語》曾發文指跟住智慧超人無乜點錯,長實(01113)於8月份宣布以27億英鎊收購英國啤酒餐飲集團Greene King,主要係睇中Greene King擁有約7000萬平方呎土地,呢項交易係對米字旗國前景投下信心一票。當時大家對於米字旗國脫歐前景仍冇信心,但長實已行先一步。今日證明咗長和系嘅眼光,今日整系股份做好。

預期港股重上250日線之後,短線可能喺現水平稍作整固,待周末及中美協議落實後,有機會再向28000挑戰,不過28000點呢一關阻力堅大,唔係咁易就突破得到,加上好消息出貨,慎防一見二萬八,大市又掉頭。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads