熱門:

2019年11月27日 港股直擊 即巿股評

【輪證贏家】等上主菜

噚日下半場見恒指分鐘圖上已見橫行,勢估唔到今日恒指都係繼續橫行款。恒指今朝升30點開市,報26943點;依家9點35分,已經見倒跌29點,報26884點。5分鐘圖見恒指SlowSTC(14,3)已經落去到嚴重超賣水平,現階段睇似乎暫時未有可以再跌嘅空間。

睇日線圖,依家見恒指又再處於20天線(27007點)以下,SlowSTC(14,3)雖然勢頭向上,但14RSI處於中軸水平,仲要橫行;而見保歷加通道亦只係三行橫線咁架咗喺個圖上面,真心同酒樓叫嗰碟叉腸無乜分別。呢啲indicate其實就係講緊大市暫時係無方向,喺27000點附近浮沉住先。

唔想郁莫非個市未有嘢食?開恒指牛熊證街貨圖睇就明,唔係無嘢食,係啲嘢食「唔夠」。依家9點44分,恒指暫時最低做過26866點計,即牛證第一貼26900至26999點全數死亡,不過呢度就只得32張期指,有無食過韓國菜?你叫一份嘢食,佢哋會放低六、七碟小菜喺檯面(有啲地方仲會有成十碟以上添),呢32張期指就好似其中一碟...涼拌芽菜掛。

主菜喺邊?牛熊兩邊都有嘅,問題係邊一邊近同抵食啲啫。睇開牛證街貨就睇埋落去先。由於第一層已經全數收回,變相26800至26899點呢度「榮升」至最貼價街貨層,所以26600至26699點嘅重貨區亦順升至第三層街貨,呢度有相當於656張期指,連同路過嗰兩層嘅話,夾埋就有830張期指街貨。

熊證方面,第一層就係27200至27299點;而重貨區咁啱又係第三層喎,就係27400至27499點,呢三層合共有1519張期指。

計多條牛熊證街貨中間數,就係以牛熊兩邊最貼價嘅門口位,再計個平均數出嚟,即(27200+26899)/2=27049.5,怪不得個市27000點附近死纏爛打啦,睇嚟個市嫌啲街貨唔夠多咁;或者個市比較鍾意食西餐,一碟扒咁捧上台檯面,大塊肉、大杯酒咁食,多於食六、七碟小菜先至到主菜嘅韓式料理。

至於我就鍾意食泰國嘢,酸酸辣辣好好味,「有人問你鍾意食乜咩?」我知無,不過我只係想話比大家知,聽日開始我放假啦,就係同我家老爺去泰國食我至愛嘅泰國菜啦,所以【輪證贏家】同【輪證下半Part】都會暫停營業,直至12月9日再同大家見面。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads