熱門:

2019年11月14日 港股直擊 即巿股評

【盤房來料】阿里巴巴搶走騰訊資金

隔晚美股早段下跌,侵侵雖然口口聲聲話中美貿易協議好快達成,但一旦反檯達成唔到首階段協議呢,就會大大力加關稅,一度嚇到早段美股有啲腳軟。不過市場認為鮑爺嘅講話都收貨,至少美國肯定有一段時間維持低息,美股其後逐步收復失地,道指更標指更再創收市新高。美股嘅強更特顯出港股嘅弱,港股已連跌五個交易日,社會運動持續並愈演愈烈,港股亦難免隨之動盪不安。

恒指低開127點,報26444點,其後一度收窄跌幅並曾倒升34點,可惜見過26605點半日高位後,內地公布上月工業增加值及零售銷售均差過市場預期,大市隨即反覆向下,最多跌285點,見26286點半日低位,創下超過一個月低位。中午恒指報收26326點,跌245;國指中午報收10424點,跌95點。

其實大市彈唔起,除咗係氣氛影響之外,恒指成份股重中之中嘅騰訊(00700),交出一份強差人意嘅季度業績,細摩率先將佢降價,其後有冇其他大行踩多腳未知,但股價半日跌2.7%。之前阿Man都提過,騰訊反彈一直未能突破340-350元阻力,隨時反彈浪已告一段落,結果業績前見騰訊已無厘神氣,再加埋一份咁嘅業績,今日跌穿320元屬意料中事,有心理準備可能要回到300元水平先有較大支持。

另一個令騰訊股價表現疲弱係另一科技巨無霸阿里巴巴(09988)明日開始招股,亦有機會扯走騰訊嘅資金,令其沽壓更大。相反阿里巴巴順利回歸港股上市,港交所(00388)可蟬聯新股集資額一哥,港交所股價呢期應可跑贏大市。其他重磅股個別發展,瑞聲(02018)半日升3.7%,叫做最好表現藍籌股。

講到口水乾都話呢期陀地地產股避之則吉,原因係乜唔再重覆,要保平安呢期咪買本地地產股,仲月本地銀行股都因為經營環境問題,同樣暫不宜沾手。早兩日阿Man叫睇番物管股,今日又係逆市奇葩,資金嘅嘢好得意,愈升愈要追入買,所以喺股票市場,跟紅頂白無乜點錯。

特別一提係上星期阿Man指平安好醫生(01833)調整近尾聲,52元樓下可以撈貨,呢兩日又係逆市走強,反映之前調整已告一段落,留意股價若能企穩58元,挑戰高位無難度,新高可期。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads