熱門:

2019年10月29日 港股直擊 即巿股評

【盤房來料】資金繼續留戀物管股及醫藥股

侵侵表示可以較原定時間更早跟中國簽署首階段大部份貿易協議,呢個消息唔單止令道指重上二萬七點,更為標指創新高而助攻。除咗中美貿易協議進度理想之外,美企業績普遍好過預期, 而大部份企業更未有對經濟前景感到悲觀,令資金避險情緒減退,美股做好之際,金價已跌穿1500美元。

恒指今早隨美股高開136點,可惜呢個已經係半日高位,其後內地股市下跌,加埋有人肉熊證之稱嘅特首,喺行政會議前發表講話,港股亦無奈倒跌,最多跌113點,見過26777點半日低位,暫時喺10日線(26744)有啲支持,不過老實講呢條線嘅支持力度有限,26700一穿,話咁易就殺到落去20日線(26406)同50日線(26348)。幸而暫時無乜利淡消息令大市要大大力踩落去。

大笨象(00005)跟騰訊(00700)先後失守重要支持位,兩隻重磅股係跌市最大隱憂,兩股半日合共拖累恒指跌77點,齊齊跌逾1%。大笨象雖然維持派息,但喺股東回報方面擺到明唔會達標,兼且表現其後或出現重大撥備,變相事先張揚發盈警,大行當然加多腳落力唱淡。其實持續嘅社會運動,令本地銀行經營環境變差,今日大摩出咗報告唱淡本地銀行股,恒生(00011)係其中一個被調低目標價嘅對象。至於萬洲(00288)首三季生物公允價值調整後盈利升37%,績後獲多間大行睇好,半日升逾7%,只不過股價裂口跳升後,上半場遺下陰燭一枝,若然下半場維持咁嘅狀態,未有貨想上車都要睇定啲。

資金仍然留戀醫藥股跟物管股,呢兩個板塊一直吸引資金流入,主要係唔受貿易戰影響之餘,亦免疫於經濟周期變化,算係攻守兼備嘅板塊。而大行繼續唱好物管股,令唔少物管股再創新高。可能唔少缸邊友對於破頂股都有畏高症,但阿Man剛好相反,破頂股唔單止進入無障礙通道,亦無任何蟹貨區阻頭阻勢,相對弱勢股,阿Man寧買當頭起。

平安好醫生(01833)有股東批股,配售價較噚日收市價折讓3%有多,半日平安好醫生仍守住配股價,況且之前累計升幅唔少,有股東想食糊亦無可厚非。阿Man認為喺北水撐腰下,平安好醫生只要守住喺55元樓上,都只係短線調整,整固過後隨時再現升勢,之前有跟阿Man低位上車,唔使太急跳車,暫時仍可以持有。至於兩隻W股,北水噚日力追,今日見回吐,不過美團(03690)跌不足2%,跟小米(01810)跌穿9元嘅弱勢無得比,都係嗰句,美團破咗頂上面輕鬆,相反小米蟹貨段段有,醒目缸邊友要炒W股應該識得揀。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads