熱門:

2019年10月22日 港股直擊 即巿股評

【輪證贏家】100天線+保歷加通道頂=新阻力

今朝返工如常坐巴士,但勁奇怪,車上乘客唔多,9點10分上車,9點25分到就已經到公司個站,返到上嚟開晒機、斟好水、吹埋水,都只係9點45分,今日好似比平時順暢好多咁。

不過恒指就似乎唔多順暢,係直頭唔郁添呀,今朝開市報26813點,升88點;到依家恒指倒跌3點,做緊26722點。暫時見到悶嘅情況同噚日不遑多讓。

睇返恒指日線圖,最近呢四個交易日恒指點數水平差唔多,已經可以畫到一個「長方形」出嚟,而今日恒指仍然貼住保歷加上道通頂部(26965點)運行,同步見到上方仲有條100天線(27028點)喺度,呢兩個位只係相差63點,如果100天線同保歷加通道頂各自按住目前嘅落同拓闊嘅速度移動嘅話,唔駛幾耐呢兩條線就會相交,如果喺相交之前恒指都未能夠升穿呢個位嘅話,咁就會變成佢一個較大阻力。反轉頭諗,港股咁悶,唔通大家都等緊四中全會?Who knows!

都係睇返恒指牛熊證街貨圖啦,上方熊證街貨新增咗一層26800至26899點,呢度只有相當於19張期指街貨;至於下方牛證就有兩層新增街貨層,分別係26500至26599點,同26400至26499點,分別有相當於80同192張期指。

熊證重貨區仍然係27100至27199點,期指張數變化不大,少咗12張,有858張;至於下方牛證重貨區就仲係好遠,喺25200至25299點,但只有661張期指。再望望牛熊街貨比例其實唔係爭好多,講緊47:53,但從棒棒圖見到熊證嘅街貨係比較集中喺貼價範圍;而牛證呢就層層都有啲,唔見有個別一兩層或者一個範圍係特別多貨。

望望電視機,恒指依家做緊26774點,升48點;至於恒指牛熊街貨中間位就係(26800+26599)/2=26699.5點,坦白講依家牛熊兩邊嘅距離愈嚟愈窄,恒指當下呢一刻企近熊證區,但唔排除稍後又會企近牛證區,彈出又彈入但就兩邊貨都唔吼,怕且都真係等夠數先至開餐。

作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

電郵:[email protected];FB:輪證贏家

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads