熱門:

2019年7月2日 港股直擊 即巿股評

【輪證贏家】恒指急彈 補唔補5月裂口?

個市吽咗幾日,大家都知道擺到明係等G20單嘢之後先再算,最後結果係中美雙方暫時休戰兼話重新啟動對話,而美方就焗部放生華為,所以搞到今朝個市彈升361點,開報28904點;啲電訊同華為相關股份今朝都相繼彈起。

依家9點58分,恒指升幅比今朝開市多咗,做緊28943點,升400點,最高暫時見過28957點,雖然只係爭少少就上到29000點,但今日一彈一舉升穿多條平均線,都已經係一個壯舉;同時下方10天線(27183點)進一步再升穿50天線(28607點),又一個「黃金交叉」出現,睇嚟衝嘅力度夠強之餘,下方向好嘅技術指標又成為咗back up,睇嚟好友下一個目標會set恒指挑戰返5月頭嗰下跌裂口(29480至29678點)呢個位。

睇埋恒指牛熊證街貨圖,依家10點23分,恒指高位仍然都係今朝mark嘅28957點,先係頭三層熊證街貨28600至28699點、28700至28799點同埋28800至28999點全數死亡,呢三層夾埋有2806張期指,至於28900至28999點嗰467張期指,按恒指高位計,其實當中有一半熊證已經死亡。而再上嘅29000至29099點呢度,就有相當於762張期指,對於熊證嚟講已經係一個重貨區;同時見恒指今日咁彈升法,你估會唔會有資金追貼熊博個市升得盡得滯會掉頭?

「咁強嘅氣都博掉頭?」還記得以往坐貨過夜時,如果第二日開市買中向嘅話,開市頭段會再住開市嘅方向再行多幾步,但呢個時候亦係正好將之前買落嘅貨收割嘅時候,因為當個市「再行多幾步」時,技術指標同步都被拉往盡頭多幾步,一旦觸發鐘擺,會市就會反方向行,到時唔係話放唔到貨,只係賺少咗幾格你會覺得唔抵啫。

同樣市況,但遇上高手或即日市trader嘅話,前者先會喺「再行多幾步」時放走坐過夜嘅貨之餘,會反手入隻貼價輪(槓桿高嘛)以買大市反方向行;至於後者,咪就係只會高手嘅第二部份:趁個市推到技術指標至盡頭時出手買反方向,同樣用高槓桿輪證做trade。

自問快手嘅你,你當然可以咁做,反正依家(10點35分)見恒指5分鐘圖SlowSTC(14,3)keep住喺超買水平;不過,如果係以「日」計嘅短炒嚟講,日線圖上平條平均線繼續往順序方向排列,保歷加通道口仍然拓闊比位個市行,而恒指現價(10點37分報28917點,升374點)點都同上方熊證較近,下方牛證第一層為28400至28499點,同現價有近500點距離,只係日線圖恒指擺明高位呈「十字星」,但今日都仲未收時架嘛,你又點知一陣會唔會變成一支「大陽燭」隊升?

恒指Call(27447), 行使價29338點,呢隻嘢嘅所有條款其實係同另一隻Call(27338)一模一樣,唯一唔同嘅係兩隻嘢嘅街貨同成交,雖然(27447)嘅街貨係比(27338)係多啲,但講緊呢兩隻Call嘅街貨都唔過4%;至於成交方面,(27447)就多(27338)10倍多有多,向來成交都只係剎那嘅事,但當所有條件相當之下,真人系要秤嘅咪用成交秤囉。

作者阿珊,從事財經及投資版報道逾10年,由平面媒體走到網絡世界,《鐘擺戰策贏港股》作者。相信技術分析,專玩輪證,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads