熱門:

2019年5月15日 港股直擊 即巿股評

【輪證贏家】「下降通道」中的陽燭

今朝早一返到公司,見到枱面有大拿拿九個7-11印花,問咗兩三個同事都唔知係邊個放低,最後我得到嘅答案係「Secret angel」...跟手喺淘寶集運WhatsApp group再問多次班同事,最後成team裏面最「慈祥」嘅同事MK舉手話係佢放低,就唯有代designer阿Ken個仔同佢講句「多謝」,因為係呢個小朋友要印花去換筆袋喎(好似係用嚟放passport嘅袋嚟...是但啦)。

噚日推咗一隻喺輪證場上相對冷門嘅underlying:領展(00823),仲揀咗隻Call(25543)出嚟。拆開領展5分鐘圖睇,其實都真係得朝早開市後15分鐘至30分鐘(即9點45分至10點)SlowSTC(14,3)處於超賣水平,跟手股價係咁被人推高,上到$96附近呢啲位就停一停,但如果要再等到5分鐘SlowSTC(14,3)落返去超賣位嘅話,就講緊等到下晝3點25分至35分。

就用呢兩個時間計,朝早嗰段時間(25543)高低位做過$0.182/$0.168,平均買入價就係$0.175;下晝嗰段時間(25543)都只係做過$0.27呢個價。坦白講如果係噚日朝早嗰段時間入貨嘅話,就算你揸到今日,以依家10點9分(25543)證價做緊$0.243計,賺幅都有38.9%。

但如果係噚日下晝臨收市嗰段時間買嘅話,一係就好堅持唔過夜,喺收市前走人,不過最多得10格(不過講緊呢10格真係要拉到好盡好盡,事關噚日領展以全日高位$96.8收市,嗰一下就真係臨收市前1分鐘做出嚟,你可以將領展個圖拆到1分鐘咁細就見到啦)。到依家10點13分,(25543)證價仍然做緊$0.243,5分鐘圖見領展SlowSTC(14,3)處於超賣水平,要走隻(25543)亦唔係依家呢個時候。

睇返恒指,今朝早恒指終於見反彈,都係嘅,噚日低位27925點穿過條250天線,嚇到一眾好友心都離一離,好彩最後恒指都爬返上去28000點樓上收市;同時見恒指條「下降通道」貼底行都行咗咁耐,已經累積咗唔少繼續博反彈嘅錢喺度,今日一彈就連條100天線(28162點)同埋保歷加通道底(28163點)都收復埋,14RSI又喺3X水平作勢回升;怪不得今日見到恒指牛熊證街貨圖上,一堆資金追住貼牛博反彈。

依家10點29分,恒指做緊28247點,升125點。呢個點數放落牛熊證街貨圖上,唔計食晒,齋計行到牛熊各自最貼價嘅門口,現價需要再升753點先可以上到熊證29000至29099點嘅門口,而呢度有相當於558張期指;掉頭向下嘅話,現價跌248點就可以到牛證27900至27999點嘅門口,呢度有相當於518張期指。

按照牛熊證街貨圖嘅走勢,恒指續下行嘅機會都唔細,不過日線圖上恒指亦作勢反彈,兩樣嘢撈埋就視為「下行中的小反彈」,你見一條「上升/下降通道」裏面都唔會清一色陽/陰燭架嘛,依家極可能就係喺「下降通道」裏面出現一粒陽燭,依家10點43分,趁恒指5分鐘圖SlowSTC(14,3)就殺到落超賣時,準備定隻恒指牛(63372),收回價27868點,同現價有近400點差距,槓桿比率約88倍真係好適合day trade,記住係day trade,短線目標上到去「下降通道」頂部約28500點,同現價有約200點鬆啲水位。咁高槓桿,心臟病、血壓高、孕婦、要開會嘅人士都不適用。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads