|
熱門:

2019年4月18日 港股直擊 即巿股評

【輪證贏家】噚日隻恒指熊你食咗未?

噚日喺恒指日線圖上畫咗個「平頂下降喇叭」出嚟,而剛好恒指噚日亦處於嗰「平頂下降喇叭」嘅頂部,於是就揀咗隻恒指熊(68174),喺下晝1點25分至2點5分,恒指5分鐘圖上SlowSTC(14,3)見超買水平,呢段時間(68174)高低位為$0.083/$0.075,平均買入價就係$0.079。說時遲,那時快,喺下晝2點30分至2點35分,恒指5分鐘圖上SlowSTC(14,3)「蓬」一聲由超買跌返落去超賣,如果嗰時將(68174)火速走人嘅話,按平均賣出價$0.0865計算,不消一個鐘就袋咗9.5%賺幅。

不過,呢啲咁嘅lunch time鐘數,大家都係部住「安心偷食」有無新進展多過個市架啦,學讀者kvisionkk話齋:「就係因為得果一個鐘鬆啲,邊捉得咁準呀⋯⋯lunch time都要食飯啦!」如果Miss咗嘅話都唔緊要,事關下半場大約3點35分到,見恒指5分鐘圖上SlowSTC(14,3)再次出現超買水平,呢個時候(68174)高位低$0.081/$0.080,拉個平均數$0.0805作為平均買入價。雖然明知道呢個鐘數入市就預咗過夜,但今朝U盤開始時見騰訊(00700)、友邦(01299)跌嘅時候,個種心情有無激動過噚晚《愛‧回家》得返隻純音樂做開場音樂呢?

依家10點7分,返到公司斟好杯茶坐底開晒電視電腦,打稿打到呢個位,再睇埋戰友Jack share比我佢team head早排接受其他傳媒訪問嘅報道後,恒指早早無咗30000點,就連戰友Jack都話「又無咗30000點」,呢個30000點個義意就嚟近乎零。而呢個時候見恒指5分鐘圖上SlowSTC(14,3)已經落到嚴重超賣水平,呢個時候就可以將過咗夜嘅(68174)放走,以10點至10點15分(68174)高低位$0.105/$0.099,拉個平均賣出價$0.102計,平均賺幅為26.7%。

依家10點24分,恒指日線圖見「平頂下降喇叭」形勢未改,只係今日無噚日咁「痴」住個頂啫,不過過埋今日就係一連四日嘅復活節假期,一就係今日即買即賣,一係就有決心過四日夜,如果無嘅話,(68174)收咗工就算啦;更何況你睇恒指牛熊證街貨圖,最貼價牛證30100至30199點得嗰23張期指;最貼價熊證29900至29999點得嗰78張期指,啲重貨位無雷公咁遠,睇嚟今日個市都可能係30000點附近浮浮沉沉咁過一日就算。

人家偷吃事件噚晚出咗下半part,不過小妹今日就出唔到隻[下半part],事關今日下晝要去見牙醫做檢查,提早祝各位復活節快樂!下星期二(4月23日)見。

電郵:[email protected].com;Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。