熱門:

2019年3月25日 港股直擊 即巿股評

【輪證贏家】友邦跌穿保歷加通道底

上個星期五(3月22日)先估個市可能跣一跣腳,連穿10天線同20天線以殺當時最貼價堆重牛28900至28999點;跟手礙於恒指日線圖條50天線同250天線距離太近,有機會出現「終極黃金交叉」,但同時條SlowSTC(14,3)%K線又高位跌穿條%D,且下方啲牛證又鬼死咁多,好壞訊號都出齊之下,唯有選擇避一避,穩陣啲嘛。

今朝起身開電視,見到右下角日經粒數跌逾500點;刷完牙出嚟再睇,已經跌夠600點;而今朝出push嗰message 跌市個原因只係:憂慮經濟增長前景,區內股市向下。唉...呢啲咁嘅原因真係同廢話無乜分別,但當無特別事發生過而個市又表現得咁差嘅時候,呢啲就係百搭嘅「原因」。

是但啦,咩原因都唔係重點,重點係個市真係向下跌咗啦嘛,睇恒指日線圖,依家9點56分,恒指最低暫時做過28498點,由28800至28899點,以2點之力殺到落28500至28599點,四層牛證夾埋有3864張期指。喺期結之前做到個咁嘅成績,我唔係做financial嗰行我都為你哋而驕傲呀。

依家下方牛證最貼價嘅係28400至28499點,但只有相當於337張期指;至於上方熊證最貼價嘅就係29300至29399點,呢層係新嘢嚟嘅,有相當於79張期指。以依家10點正恒指做緊28646點,跌466點(收窄咗好多,事關一開市咁大個裂口下行就知道所有技術指都被個市向下扯,所以到正式開市之後啲技術指標喺嚴重超賣的極端作反彈,就算唔殺返上去嚴重超買,點都要去返中軸水平先啦)

換條保歷加通道出嚟,恒指現水平由原先處於保歷加上升通道,落到去保歷加下降通道,但未去到保歷加道通底(28320點),只係處於中軸(28902點)同底之間。拎返嗰五條平均線出嚟,條50天線(28164點)真係升穿條250天線(28120點)架,「終極黃金交叉」真係出咗嚟架,只係威力輸比「憂慮經濟增長前景,區內股市向下」之嘛。

個市裂口跌到咁,依家最重要嘅係比返啲時間個街貨圖儲返啲貨,下面堆牛證死晒大家有目共睹啦,而上方嘅熊證,比你手揸熊仔都一早收割,今晚準備加餸啦。無貨無肉食架,由得個市hea陣先啦。

個股方面,友邦(01299)同市一齊裂口下行,殺穿咗條保歷加通道底($75.042),但就有條50天線($73.798)可能做住彈床,SlowSTC(14,3)未落到超賣位,有興趣嘅可以等多陣。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads