熱門:

2019年2月18日 港股直擊 即巿股評

【輪證贏家】28500點又見重貨

今朝早起身開電視,左上角報時同天氣嗰度有個落雨嘅logo;再望出窗見到條隧道,嘩~塞到呢...所以我今日都比平時遲咗接近半個鐘先返到公司,「咁做咩唔早啲出門口呀?」有分別咩?個個都係咁諗時,嗰段時間先至最塞呀!

依家10點9分,返到嚟市都開咗半個鐘;今朝未出門口時睇咗5分鐘財經節目,兩位女主持一開始就講返上個星期五(2月15日)道指升逾400點,而日經都升逾300點,咁港股又有乜可能唔受帶動呢?今朝早一開市恒指升286點,報28186點;依家10點12分,恒指已經升到上28336點,升435點。

上個星期五無落場嘅主要原因係恒指向下啪落去之後,當下跌穿咗唔少支持位,基於唔知個市真係升咗咁耐之後要調頭,還是只係爬上山嘅途中跣一跣腳。今日見恒指奮力向上升逾400點,以最高暫時做過嘅28379點計,其實第一層熊證街貨28300至28399點嗰113張期指已經被食得七七八八;再上多一層28400至28499點,咦?一張期指都無;添啲呢,上到第三層(28500至28599點)同第四層(28600至28699點)呢度先見真章,分別有1317同1298張期指係度,以現價(10點18分見28352點)計,恒指現再升多347點先可以食得晒呢2615張期指。若然個市選擇喺今日下半場做埋嘅話,咁豈不是今日升成700幾點?

睇埋下面堆牛證先,最近嘅就係27800至27899點,呢度有相當於715張期指;再向下掃落去,其實最近五層牛證街貨,平均一層有605.2張期指,分布得好平均,只係見到今日升400幾點嚟講,極有可能已經將牛證先行收割,再換一隻貼價啲嘅牛證,目的為求繼續以高槓桿作以快打慢嘅策略。

望望月曆好快又到業績期嘅春祭高峰期,聽日仲有滙豐控股(00005)同恒生銀行(00011)公布業績,唔少券行喺業績前已經下調大笨象嘅目標價,萬一聽日份業績有咩亮點嘅話,呢個亮點有可能產生「一石激起千浪」嘅效應,再打起個市而上行去食重貨都未定,恒指牛(67444), 收回價27642點,同現價有逾600差距,喺收回價差唔多嘅牛證之中槓桿比率偏高,吼恒指5分鄉鐘圖見超賣小注落場。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads