我都真係開始發覺自己買恒指輪證好過買個股輪證，經過我心算/極度粗略/無系統地計算，我都好似十次有九次向個股埋手都係無乜好收場。今朝做緊U盤時見到港交所(00388)個價都心知不妙，明明落到保歷加通道中軸，誰不呢一張彈床彈過乜，將隻港交所彈返上去，咁樣破位法隻港交Put(23790)仲有乜可能再留底。至於噚日喺[下半part]揀出嚟嘅恒指牛(66749)，基於下半場未見恒指5分鐘圖見超賣，所以亦都只能鮈坐喺後備席，出唔到場。
唉~我都係專注返睇恒指好過，就好似啲馬咁帶住個眼罩去跑，咁就唔會跑緊嗰時掛住望隔離左右而唔向前跑(老爸教嘅)。依家9點54分，剛剛收到公司email話樓下有舞獅睇，Designer Ken叫陪佢落去睇；睇乜鬼呀，自己隻稿又未交；人哋交比我嘅稿又未上。
開個恒指牛熊證街貨圖睇先，28200至28299點呢度雖然有165張期指離場，不過呢part都仍然有成1417張期指喺度駐守，同現價(9點59分mark底28089點計)，兩者相差210點，而呢度係第二貼價嘅熊證區，排頭位嘅就係28100至28199點，呢度有相當於105張期指，按暫時最高做過28120點計，呢part都有少量熊證死亡。
至於下方牛證區，最貼價嘅係27600至27699點，呢度有相當於540張期指，全數新貨，同現價比(用返頭先mark底嘅28089點計)，兩者相差489點。按過去一貫嘅做法同策略，係會部署入恒指牛等佢上28200至28299點食重貨；甚至再狼死啲，上28400至28499點嘅終極重貨區(呢度有相當於1201張期指)，噚日揀出嚟嘅(66749)仍可取，同現價有逾600點差距，希望報得返隻(23790)嘅仇啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
#輪證贏家# #輪證下半part# #窩輪# #牛熊證# #恒生指數#
