熱門:

2019年1月24日 港股直擊 即巿股評

【盤房來料】春節將至市場資金傾向保守

之前阿Man講過美股業績期間,只要大部分業績生生性性,唔出乜嘢岔子,美股喺業績期之內,應該都係安全期。雖然周二美股顯著下跌,但隔晚喺IBM及寶潔交出一份亮麗業績之下,美股又生猛番晒,加上中美雙方均否認月底取消更高級別官員會談,市場憧憬中美貿易協議最終能於3月1日死線前達成,美股三大指數回升。

不過阿Man對於中美雙方能於死線前達成協議,完全化解雙方分歧都係半信半疑,皆因中美就知識產權嘅分歧實在大到難以想像,估計喺死線前或者畀點甜頭大家,但要真真正正解決貿易戰問題,仍有漫漫長路要走,雙方都係一味拖字訣。面對咁嘅狀況,預計資本市場都係唔生唔死,唔湯唔水。

恒指今早高開67點,報27075,開市後曾升86點,高見27094點。其後大市腳軟,一度跌118點,低見26889,接近10日線(26880)有買盤支持,港股又再回升。恒指中午報27045點,升36點;國企指數半日收報10659,升28點。

重磅股普遍造好,只有騰訊(00700)半日跌1.4%,其他大笨象(00005)、平保(02318)均見上升,但濠賭股有大行唱淡前景,只有澳博(00880)因為幾個主要股東組聯盟,半日抽升8.5%,二房嘅信德(00242)變相孤立四房,信德股價半日升6.2%。

雖然油價仍然疲弱,但三桶油股價向上,當中中海油(00883) 計劃擴大資本開支,油服股亦受捧,不過阿Man都係睇淡石油股及油服股前景,皆因油價熊到唔熊,而全球經濟下行壓力大增,經濟唔好對石油需求減少,石油股仲會叻得去邊。

話就話港股喺二萬七水平守得唔錯,不過資金流向反映市場避險情緒正慢慢升溫,收息股及公用愈升愈有,擺明喺眾多不明朗因素充斥下,市場資金當然趨向保守。

內地上交所創科板獲批,中資券商股又落鑊,呢個板塊之前阿Man仍睇好,皆因阿爺一直為內地股市護航,內地股市即使谷唔起,但再大幅下跌空間有限,正所謂唔打得都睇得,內地股市企定定,中資券商股回調整固完再升多浸都合理。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads