上回講到，恒指超買超買再超買嘅情況之下，基於牛熊證街貨圖上儲咗大量嘅熊證喺度，所以恒指都仲有理由向上走；恒指今朝果然續上，依家9點56分，恒指升70點，做緊27161點，最高暫時做過27202點，未開牛熊證街貨圖睇之前，先開日線圖已經見今朝恒指成功升穿咗條150天線(27052點)；換條保歷加通道出嚟睇嘅話，都唔知第N日貼住條保歷加通道頂上行，成排陰陽燭好似叉燒咁掛咗一排喺度，而同一時間，保歷加通道口繼續拓闊，即係話連保歷口通道都比位個市上行，懶理SlowSTC(14,3)兩線上到90幾。
開埋恒指牛熊證街貨圖出嚟，27100至27199點嗰390張期指當然無晒啦；依家10點8分，諗住望望電視機，就咁啱被我見到恒指升穿27300點，做咗27303點嗰一吓，仲忍唔住對住個電視「哎呀！」咗一聲添，好彩坐我隔間左右聽唔到啫。穿呢個位就代表咗27200至27299點相當於1224張期指嘅街貨亦全數死亡，變相依家最貼價嘅就係27300至27399，而呢度就有868張期指。向上望多兩層，啱啦，即係依家第三貼價嘅27500至27599點呢度，有相當於1659張期指嘅街貨，嗱！各位圖友，呢度就係目前熊證區最重嘅街貨啦，同現價爭300點，唔係好多架咋。
團友團友，依家落返山行去探吓啲牛仔啦，最近嘅就係26600至26699點，呢度有相當於178張期指，同現價(10點23分做緊嘅27186點計)，現價下行多586點先可以行去入嚟門口，莫講話殺埋添啦；再加上恒指升咗咁耐，大家開始由追升 > 捉轉角 > 捉唔到(係呀！我呀！捉唔到呀~ 哈哈) > 再追返升，不過今轉嘅追升同第一轉一定唔同，因為今鋪再追升就等同坐音樂椅嘅心態一樣，「點知邊個咁唔好彩摸到個頂呀！」Exactly！所以就算今輪追升，大家都係見好即收，唔會長揸(講緊揸多一分鐘都唔想)，又所以解釋到點解啲牛證咁少(根本連過夜被你count到有街貨嘅機會都無)。
剛剛衝上27300點可以快速理解成為「受中國經濟數據造好刺激」，之不過個市又係咪真係咁易放過上方啲肥熊？既然個市都冒着超買超買再超買嘅技術走勢而去殺熊嘅話，咁真係未必會咁易放過27500至27599點嗰堆熊證。恒指Call(11718)，行使價27738點，同現價有1%價外，最吸引嘅就係佢實際槓桿約25倍，「牛證嘅槓桿咪仲高...」我怕死呀嘛~
本身見到個市再上個人條氣都順啲，事關上個星期搞隻友邦(01299)嘅熊證(66189)搞咗成個星期，最後更係buyer跪低架啦，你幾何見到個市為咗個buyer跪低架；今日見友邦逆市下行，仲要跌成1.X%，你明唔明白心中個團火依家係燒得幾咁「冚冚聲」...唉...算數，做人嘅嘢唔可以成日都咁激動，唔係一陣血壓又高，都係落樓下買杯咖啡先。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo[下半part]：#Gladyshan#
