今日平安夜半日市，阿Man提早喺上午開市前同大家《盤房來料》，只不過係連續兩日聖誕假期後，下周一又到大除夕半日市及周二元旦假期，唔少缸邊友早已提早收爐，甚至拎埋幾日大假，連埋兩個周末，自製超過10日長假期，再加埋港股通因為下周一及二內地假期而暫停，北水暫停南下，盤房肯定靜過鬼，好老實仲邊有料來。
上周五美股認真陰公，以為VIX已去到28咁鬼高，都係時候要反彈，可惜聯邦政府因為侵侵同民主黨就美墨邊境圍牆撥款問題上僵持不下，政府陷入停擺，部分政府機構上周六開始關門大吉，更有可能延續至下月亦未能解決，搞到美股繼續插水，VIX更高見30水平。雖然美國政府停擺已經唔係第一次，但事件發生總會影響市場投資情緒，再加上侵侵有意怒炒聯儲局主席鮑威爾嘅謠言滿天飛，美股未能止跌，上周五三大指數跌勢未止，道指再挫愈400點，標指跌超過2%，納指跌幅更接近3%。
港股喺上周五本來靠騰訊(00700)拗腰倒升帶動大市低位回升，以為可以向住二萬六水平進發，豈料美股咁搞一搞，當晚喺ADR及夜期已再度腳軟，周一新加坡黑期開市跌勢加劇，暫時連25400水平亦不保，意味住港股喺平安夜將低開逾300點，果然係聖誕快落。
侵侵有幾霸道，喺其執政呢兩年有目共睹，其內閣成員好次走馬燈轉嚟轉去，而佢對鮑威爾有幾不滿人所共知，只係聯儲局有別於其他政府部門，就算佢老人家幾唔妥呢個主席都好，要炒鮑威爾魷魚亦無能為力。之但係有咁嘅傳聞就會嚇親投資者，皆因侵侵做嘢一向不擇手段，唔排除佢未能名正言順向鮑威爾派信封，亦可能使橫手逼其自己請辭。一旦侵侵得逞，聯儲局嘅獨立地位動搖，對美國甚至全球金融市場，將會係一場災難，難怪華爾街一聽到呢個傳聞即雞飛狗走。
今日港股低開已無懸念，會否如上周五案件重演，先低後高阿Man無水晶球答你唔倒，只可以肯定係港股近日成交奀到咁，大戶要舞弄指數實在易過借火，仲要今日得番半日市兼且逼近期指結算，大戶轉倉之餘亦可能乘機搞大個單日波幅嚟搵食。長假在即，衍生工具時間值貶值加快，持倉過假期係搵自己笨，炒即市波幅啱邊好地地，錯邊跌落地又攞嚟衰，倒不如食住花生等放假，睇住個市聖誕快樂，總好過持倉過快落聖誕，過番個輕鬆平安夜。
麥狄文
(徐狄怡‧證監會持牌人)
