熱門:

2018年12月18日 港股直擊 即巿股評

【輪證贏家】我真係唔知平保就嚟到底啦

噚日揀咗隻恒指熊(69755)出嚟,吼到朝早11點見恒指5分鐘圖SlowSTC(14,3)出現超買時落場嘅話,以(69755)當時做過高低位$0.078/$0.075計,中間數係$0.0765。但之後個市真係悶到呢...個5分鐘圖同人哋宣告死亡嘅心電圖真係無乜分別,去到下晝(69755)係執到啲嘅,但皆因噚日見到條恒指波幅指數(VHSI)向下行緊,又反正見到下方牛證嘅街貨比上方熊證多又近,所以決定點都要等條恒指波幅指數回落到嚴重超賣時,等佢一彈激起個市千重浪啦。

今朝起身見到日經跌300幾點,而噚晚美股又出現急瀉,真係唔好問我點解,我真係唔知(X1),開新聞睇吓,頭嗰兩句講嗰理由來來去去都係話怕星期四(12月20日)美聯儲加息,短期經濟唔OK呀,又話中美貿易戰未解決呀(根本由開始到依家無未解決過,講緩和嗰班其實同方健儀幫政府賣廣告嗰句「九成九高仿等於百分百冒牌」一樣)。Any肥,今朝恒指都只係跌184點開市,雖然係唔夠日經同噚晚美股多,但26000至26099點嗰300張期指好好醜醜都叫做食晒;至於(69755)今朝彈上$0.089,最高見過$0.091,呢個位唔走我點籌夠旗貢獻比我老爸作為佢5X歲嘅生日利是呀。

依家10點11分,恒指已經收復今朝個失地,依家又keep住橫線一條,做緊26108點,升20點;但按恒指暫時做過最低位25903點計,25900至25999點嗰252張期指其實都已經被殺得八八九九,嗰3點就當佢唔存在啦!戰友Jack今朝先話咩事個市會放過25400至25499點同25500至25599點嘅牛證,我真係唔知(X2),我只係知道雖則依家25800至25899點係下方牛證第一梯隊嘅話(都話當25900至25999點嗰堆都全數死亡囉),咁如果個市繼續keep住無水而真係要爬落去食呢兩個重貨的話,再又假設VHSI同恒指步速一樣,就係只係用多300點去殺呀,依家咁嘅時勢根本就一隻係龜,另一隻係樹懶,咁真係可能出年先到。

坦白講,臨近年尾都真係唔好問我仲有咩可以炒,我真係唔知(X3),我只係見到中國平安(02318)嘅日線圖SlowSTC(14,3)%K線同%D線準備到底炒上;開多條保歷加通道睇,原來今日再次踩住條保歷加通道底喎~呵呵,唔通你就係傳說中會帶比人平安同幸福嘅聖誕老人?平安Call(13606),行使價$75.05,一如以往的吼5分鐘超賣先落場,但抱住個心態係「掛隻襪係窗邊(我屋企真係無火爐咁high),等聖誕老人放禮物入去」;你唔會搵把刀「行」住聖誕老人條頸迫佢比禮物你架嘛,所以唔需要勉強落場。

電郵:[email protected];Weibo[下半part]:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads