今日架巴士好鬼快，搭二上車，搭半到我就落車；返到嚟公司第一件事>去咗個廁所先；第二件事就係開機將隻滙豐Call(15093)送走，事關坐緊車返公司時，港股已經做完U盤，恒指高開逾200點，滙控(00005)就更係升埋一份啦。到正式開市時，見到隻(15093)已經升咗廿格有多，呢個位仲唔收割等咩？而依家10點11分，恒指今朝升逾200點之後回一回再上，依家講緊升逾300點，上到26488點水平。我知如果呢個時間先將隻(15093)可以食多幾格，之但係...如果我知嘅話，你估我今朝仲會唔會咁早走貨？世事難料嘛！學戰友Jack話齋：當捐錢囉。
真心如果你問滙控仲有無力上嘅話，日線圖答你係有嘅。12月3號同4號「平頂」後出現四連跌，仲要有三個大裂口咁向下跌落去，到星期一同二(10號同11號)終於見到呢隻大象殘爆然後我哋開始搵定隻Call部署，噚日終於都觸保歷加通道底一彈彈上，今日再彈多劑，其時日線圖上嘅技術指標都只係剛剛由低位回升中，就連DMI條＋DI同-DI差距收窄(但尚未升穿)。「咁點解隻Call要咁快收工呀？」無他嘅，一：有錢袋唔袋？二：有留意到噚日喺[下半part]嘅假設嗎？就係假設個市向上彈，目標喺食26400至26499點嘅熊證，(按噚日見到嘅圖)食晒呢part嗰過千張期指之後，又再搵過一個藉口，反手向下殺肥牛。
基於呢個假設，就會得出一個「市彈走Call」嘅結論，that's why今朝我會選擇咁做。依家再睇多次個市同街貨圖，依家10點38分，恒指最高暫時做過26524點，即係話噚日所估嘅26400至26499點嗰過千張熊證會死，依家死晒啦；不過依家最貼價25500至25599點又儲咗過千張期指喺度，按暫時做過最高位計，若然恒指下晝向上爬多幾格嘅話，再食埋呢過千張期指確實係無難度，跟手嘅就可能按返原本假設嘅劇情：搵個藉口向下行。咩藉口？嗯...下個星期美聯儲議息、中美貿易戰嚴格嚟講係未解決、華為公主單嘢都係未解決...
不過，呢啲重要咩？不如乖乖地等個市由暫時高位上多不足100點嚟再食埋食熊嗰過千張期指之後，睇吓有無位吼個put好過啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
#輪證贏家# #輪證下半part# #窩輪# #牛熊證# #恒生指數#
