一向跟侵侵唱反調嘅聯儲局態度強硬,但早兩日突然放鴿,當然唔係買侵侵怕,突然放鴿指美國加息步伐或要減慢,主要係成班聯儲局官員睇到美國經濟前景有放緩跡象,當然改口風唔敢再博命加息。聯儲局呢頭一放鴿,隔晚美國嘅經濟數據就唔多好睇,市場擔憂美國經濟開始走下坡,避險情緒升溫,股市自然捱沽。之前科技股升得勁,自然跌起上嚟特別狠,科技股幾大巨頭「FAANG」(即Facebook、蘋果公司、亞馬遜、Netflix,以及Google母公司Alphabet)均自高位回落逾兩成,陷入技術性熊市。當中Alphabet更自2011年10月以嚟,首次股價較高位回落兩成,首次現熊蹤。
美股急挫,港股又點會有運行,恒指今早低開328點,二萬六關即失守,其後跌幅曾收窄至239點,見26132點半日高,但已失守50日線(26233點)。喺內地股市亦腳軟下,恒指再失10天線(約25960點),最多跌595點,見25776點,半日收市前跌幅稍為收窄。恒指中午收報25890點,跌481點;國企指數報10458點,跌173點。
重磅股全線插水,騰訊(00700)跟友邦(01299)半日齊跌3%,平保(02318)跟大笨象(00005)分別跌2%及1%,其他四大內銀股跌幅由0.9%至1.7%不等。隻隻重磅股都腳軟,大市能守住25800水平已屬萬幸。
近日有關蘋果負面消息不絕,新款iPhone生產訂單一降再降,蘋果股價之前弱彈後,噚晚又再插水4%,手機設備股喺港股呢邊應聲而下,閒閒地半日跌幅超過3%。雖然小米(01810)第三季業績扭虧為盈,今日股價逆市上升,更有缸邊友憧憬其股價重返招股價之上。但阿Man則認為,貴為全球智能手機一哥嘅蘋果都面對咁大困難,小米可以獨善其身?有貨好趁呢兩日反彈跳車,話唔定呢個係小米最後逃生門。
港股彈到50日線又遇阻力,主要係美股熊蹤乍現,美股貴為全球股市一哥,美股唔掂,中港兩地股市再有本事亦難免要陪葬,更何況港股反彈一直未覺成交配合,恒指由低位反彈逾千點,都不過係大戶挾淡倉嘅技倆。其實阿Man一直強調港股仍處熊市之中,只係熊二反彈可以嚟得又快又急兼狠勁十足,今日受美股所拖累回軟,睇住25800點呢個支持,失守下試25500-25700水平,亦係前一個主要密集區25650至25700之所在。暫時港股都係喺區間內移動,不過踏入今個星期,天文星象顯示水星逆行,根據往績紀錄,每當水星逆行,大市表現極為反覆,慎防急升急跌,呢段時間少做少錯,估計最快要過埋G20,中美港股先會有更明顯方向。
麥狄文
(徐狄怡‧證監會持牌人)