熱門:

2018年11月19日 港股直擊 即巿股評

【盤房來料】反彈浪未完 無謂逆市做淡

上周五聯儲局放鴿,市場預期12月聯儲局加息後,喺經濟明年有機放緩及通賬未見威脅下,明年加息步伐或再度放緩。加上市場憧憬中美貿易關係有望緩和,即使G20峰會兩國元首會面,未能完全解決分歧,但至少兩國暫緩再額外徵稅及重啟談判。

其實聯儲局放鴿反映美國經濟增長放緩風險上升,而剛結束嘅APEC各國並未有任何協議達成,亦反映各國喺貿易戰中的矛盾與日俱增。另一方面,英國就脫歐問題,內部再起紛爭,文翠珊更有被逼宮危機,其實呢幾個都算係負面消息。不過港股反彈尚未結束,大戶仍要挾淡倉,港股照升可也,對於負面消息無動於衷。

恒指高開95點,報26278,終於重上50天線(26253)之上,之後曾升213點,高見26397,但逼近26400水平有少量回吐,盤中曾倒跌37點,低見26146點。臨近中午再度回勇,恒指中午升106點,報26290;國企指數升29點,報10613。不過半日成交仍然奀豬,由上星期反彈至今,唔多覺成交有增加配合,唔少缸邊友都心思思想開淡倉,但阿Man認為正因為係成交薄弱,大戶要舞高弄低更容易,既然反彈勢頭未改,何必逆市而行。

重磅股有辣有唔辣,大戶要挾淡倉又點少得騰訊(00700)嗰一份,騰訊今早股價曾高見294.8元,但292元至295元阻力唔細,加上由低位260元亦彈咗一成有凸,喺288元至292元水平稍作整固亦合理。友邦(01299)績後均見大行唱好,股價半日升1.5%,股價能升破66.25元企穩,短期挑戰68至70元機會大增。大笨象(00005)升抵65元水平後,似乎又進入橫行整固格局,只要股價穩守64元之上,整固後向上突破機會較高。其他重磅股暫時唔似要掟彎落番去,換句話講,大市喺現水平整固後再向上挑戰較為似樣,呢個時候無謂自作聰明逆市做淡。

美滙指數喺聯儲局放鴿後有所回落,人民幣貶值壓力大減,內房股借勢反彈,不過阿Man唔覺得內房股可雨過天青,家陣不過係反彈,有貨反而要把握機會鬆人。手機設備股同樣見反彈,瑞聲(02018)跟舜宇(02382)分別彈5.4%和3.9%,不過iPhone出貨量確係走緊下坡,而智能手機又過咗換機高峰期,呢對孖寶不過係超賣後反彈,阿Man意見跟內房股一樣,有貨好趁反彈走人。

唔少缸邊友開始講緊今次熊二反彈可以上番乜嘢位,阿Man一於少理,且戰且走,只要港股仍守住25800-26000點,反彈料可持續,就趁回調吼住幾隻指數權重股,大市要再向上挑戰,都係幾隻權重股帶動。大市今日睇住26000水平係好淡分界,總之喺呢個水平之上,寧可趁低做好勝算較高。短線阻力仍然係26400至26500點,升得穿仲企得穩,大市當然有望向26800至27000進發。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads