Yo! I'm back!放完10日大假，去埋名古屋水族館同動植物公園(好細路仔呢~)最正嘅係撞啱上個星期係名古屋祭嘅前夕，喺大順商店街仲撞啱睇得到一班著住傳統和服同化咗個藝妓裝嘅人喺度巡遊，喺大順觀音寺樓梯上仲有火舞睇添；不過一落機返到香港個喉嚨就有啲乾、有啲唔舒服嘅感覺，過多兩日仲周身骨痛，拿拿聲落藥房配藥食，爆瞓三日之後今日終於有精神返工。
呢幾日真係無理過個市，連email都懶得開。今日再開返個圖見到10月11日裂口低開之後，大市低位橫行咗五日，今日都算叫做彈得高啲，依家10點12分，恒指做緊25954點，升393點，重上10天線(25755點)水平；但對比10月11日個裂口(25437至26193點)，按今日高位暫時做過25988點計，仲爭205點先可以補完，Well，計埋今日恒指連彈兩日，下方SlowSTC(14,3)%K線(20.847)低位升穿%D線(15.204)，且9MOM座山由負數水平彈返上0，作勢向正數出發，而DMI嘅+DI同-DI嘅差距亦都收窄中，呢205點不日補完。
再睇埋牛熊證街貨圖，依家10點19分，恒指做緊25917點，熊證區方面25800至25899點呢188張期指已經全數死亡，再上嘅就係25900至25999點，但呢度只係得47張期指；假設個市後勁有力，真係補到10月11日個下跌裂口嘅話，咁即係恒指有望彈上見26193點，用呢口價度上個街貨圖度，即話踩到上26100至26199點呢度(仲有嗰6點就當豪埋比佢)，而呢度依家見到係熊證第二重貨區， 有成1235張期指，連埋沿途可以食到嘅街貨，total有1379張期指。
望返下方牛證，最貼價嘅係25000至25099點，呢度有相當於2030張期指，期指數量明顯比上方嘅熊證多，不過呢個位同現價比就相差917點，路途遙遠且有理由相信，假設買牛證由裂口跌完之後第二日深信個市彈升而入貨，繼而揸到依家嘅話，按恒指期間彈咗約700點嚟計，牛證食胡嘅可能性唔細，如是者呢2030張期指有可能目見今日恒指升300幾400點時走人，咁嘅話呢層街貨又少咗。
恒指牛(69936)，收回價25458點，槓桿偏高、成交活躍，適合短炒。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo(下半part)：#Gladyshan#
