今朝未開市很多人已預計跌穿25125,果然開市未幾即穿,淡友多數會博殺埋二萬五批肥牛先收手,點知A股大翻身,就此放生25000至25058收回的15隻牛證。
相對於昨日,恒指今日暫時做出破腳穿頭走勢,更加逼近10天線(約25827),淡友唔敢放肆。呢期食住花生睇戲嘅散戶自然要嘆句「早知」,話阿爺一出手,永遠係重磅內銀帶頭。筆者無怨自己假期前不推內銀輪證,因為建行(00939)當時未超賣,更可況下星期就放榜,理論上仲可以殺多段落去。
至於本周二即重陽假前推介的新地(00016)call輪(28160),都算交到表現,新地RSI跌至18後,昨日恒指跌200點時未有再插,今日稍為反彈1.2%,已足令(28160)升12%,正股RSI最新亦只回升至25左右,尚有反彈空間,暫且繼續持有。
目前最超賣藍籌輪到長和(00001),近期在美滙指數發力上升之下,跌得甚急,今日低見79元創逾三年低位,現報80.1元,跌0.8%。預測市賬率只有0.6倍,相當低殘。今日14天RSI跌至22,係2016年12月以來最低。條款好的長和call輪選擇不多,留意(21732),行使價88.88元,明年2月尾到期,溢價13.4%,實際槓桿11.7倍,現報0.194元,跌8.9%,低位為0.177元,現價可落第一注。
羅崇博 (杜比)