周二晚美股報復式反彈，道指勁升逾五百點，一度帶動夜期當晚反彈逾300點，升至25700水平，喺新加坡黑期更一度飈升至26000水平，不過短暫嘅刺激，未能令本來疲憊不堪嘅港股起死回生。美股隔晚回吐，目前道指期貨亦偏軟，而周二晚美股急升，未見得成交配合，反而有一種由牛轉熊嘅陷阱味道。雖然美國未有將中國列為貨幣操縱國，但呢個消息係唔會令本來已接近冰封嘅中美關係解凍，阿Man完全唔多明點解會有「專家」認為港股可以借呢個消息展開反彈，仲表示反彈或有望重返27000水平。
睇番人民幣表現，既然美國未有煮死中國，中國為咗應付龐大嘅關稅，要保持出口競爭力，貨幣貶值係其中一招，今日人民幣離岸價已重返6.93水平。加上美國聯儲局嘅議息紀錄反映，局內每一官員幾乎一致認為加息有助防止通脹，而剔除貨幣「寬鬆」措辭亦適合，令美滙指數又走高，人民幣只有更加頽。
人民幣貶值對A股帶嚟嘅壓力唔細，半日A股又跌2%，上證指數更逼近2500點呢個心理關口，所謂熔斷底部不堪一擊，A股個底喺邊，阿Man都唔識睇。港股早段曾高開212點，A股勢弱拖累下，恒指一度倒跌67點，低見25394點，中午收報25424點，跌37點；國企指數半日收報10123點，跌74點。暫時恒指仍死守25400點，呢個水平爭持不下，皆因25000至25400點係好友最後一道防線，一旦呢一道防線失守，好友或要退守至24500，甚至24000水平，喺呢個月開局至今已跌逾二千點，相信25000呢一關好友將出埋奶力去守。
美國跟沙地關係未見惡化，市場對油價急升憂慮消除，油價急跌3%，三桶油受壓，而中石化(00386)第三季業績差過預期，半日跌3.7%，藍籌當中跑第尾。不過中海油(00883)跟中石油(00857)亦唔好得去邊，半場跌逾2%。
騰訊(00700)喺ADR同埋歐洲嗰邊，隔晚係威係勢上過290元水平之上，只不過美股急升後回吐，A股又唔生性，騰訊今早連290元個影都未見過，開市報286元已經係半日高位。半日報收278.4元，倒跌1%，睇個款反彈可能喺周一已玩完。其他重磅股大部份呆呆滯，只係跌多跌少嘅問題。暫時又係靠中移動(00941)頂係個市，半日升0.3%；
友邦(01299)半日亦升0.8%，一旦友邦倒跌，個市跌幅肯定擴大。至於港交所(00388)升得有啲無厘頭，今早無啦啦裂口高開4%，但係高位閃咗一陣已回落，雖然半場仍錄得逾1%升幅，但開市已被狂質，升幅無咗一半有多。
汽車股洗完再洗，跌完再跌，之前叫咗N咁多次，汽車股不宜接飛刀，多手接貨真係關人鬼事。整體大市仍然疲弱，逢反彈沽貨大方向不變，若然呢吓反彈至25700又玩完，即係同上周反彈幅度差不多，不過25700至25800又整多個頂，大市向下壓力將愈來愈重。
麥狄文
(徐狄怡‧證監會持牌人)
