美股上周五又玩過山車,道指早段高開四百點後,中段曾倒跌至25000水平,尾市三大指數回升,但目前道指期貨又再腳軟,總之就係chok 到你暈。至於港股呢,上周五喺周四嚴重超賣下,加上周末效應,唔少淡友先套利離場,令港股當日返彈逾500點,重上25800水平。可惜今日喺亞太區股市普遍腳軟之下,港股回復跌勢,抹去周五近半反彈升幅。
恒指低開117點,報25684點經已係半日高位,其後A股由升轉跌,令港股跌幅曾擴大至338點,低見2546點。半日恒指跌近260點收市。恒指中午報25541點;國指則跌121點,報收10177點 。半日成交額453億元唔算好多,但成交少唔代表沽壓唔嚴重,陰乾式下跌從來比起大成交急插更加傷。
騰訊(00700)上周五終止十連跌威咗一日,今日雖未至於打回原形,但當日升幅抹走近半,早段最高見291.6元,即係前一個重要支持位292元已由支持變為阻力。再睇番幅陰陽燭圖,暫時半日收呢啲位,幾乎將上日反彈枝大陽燭斬咗大半,反彈勢頭又被阻,後市騰訊再尋底機會,似乎大過止跌回升。反正騰訊已由火車頭變成弱勢股,都係有波幅,冇升幅,錯過咗周五嗰一下反彈,家陣都係做吓花生友算,唔值得盲衝入去再博。至於今日再隊騰訊嘅藉口,係話旗下QQ音樂喺美國嘅IPO將會延遲至11月,其實QQ音樂即使如期上市又如何,問題係騰訊基本因素有變,除咗網遊業務自第2季開始明顯放緩外,內地收緊監管遊戲審批,政策上亦指手遊荼毒少年兒童,預期下月公布嘅第3季業績難有驚喜,騰訊由高增長股變為受政策阻撓嘅股份,似乎唔應該再抱住有買貴,冇買錯嘅心態。
其他重磅股亦見唔好得去邊,今日內地正式實施新一輪降準,內銀股全線走弱,普遍跌1%以上,而人民幣滙價同樣偏軟,目前喺6.92關前徘徊。值得留意係大笨象(00005)再創52周低位,上周五反彈市相對其他重磅股表現已有相形見拙嘅感覺,今日再睇睇排盤,上周散戶嘅血肉長城,同北水買密集嘅買盤,由騰訊移師過咗嚟大笨象呢邊,但外資沽盤卻源源不絕,雞蛋擋高牆嘅結果,騰訊早有示範,估計大笨象將繼續向下尋底,即管睇吓62元有冇支持。
汽車股跟濠賭股又成重災區,跌多多,彈少少係近日特色,兩個板塊嘅數據近日都唔靚仔,咪以為跌得多就要博反彈,僅記熊市有句名言係「低處未算低,有排未見底」,加上呢個星期唔少消息包括意大利財案預算、英國脫歐談判結果等,都會左右全球金融市場,市況肯定更為動盪,反正中間又放一日重陽節假,都係眼看手勿動。
麥狄文
(徐狄怡‧證監會持牌人)