噚日一交完隻【輪證贏家】無幾耐個市就係咁向上飆，最高見過28031點，升532點，即係話27900至27999點嗰427張期指已經全數收回。
直至下晝喺《下半part》度講，恒指個勢雖則好強，但怕嘅係個市上去之後力先係太貼價嘅28000至28099點嗰堆街貨有可能有部份轉移陣地，換上一個收回價遠啲嘅位置；又或者唔少人趁個市彈到High High High，就搵隻Put/熊出嚟大叫Go go go，換言之即係入淡倉嘅錢就多咗，既然係咁就跟大隊入Put啦，名就無點嘅，只係叫大家揀隻貼價啲嘅Put。拆開恒指5分鐘圖睇，噚日下晝1點30分，SlowSTC(14,3)已經係嚴重超買水尾，之後大家見恒指升幅由逾500點一路收窄到收市時得返300幾點，呢段時間SlowSTC(14,3)就由嚴重超買回返落去超賣，殺到落2點30到啦，就keep住喺呢個嚴重超賣嘅水平。按策略計呢啲位絕對唔係入Put/熊嘅好時機嘅。不過，恒指今朝開市升96點，做27912點；到依家9點48分，恒指升轉跌做27759點，跌57點，呢個波幅同噚日比真係蚊比同牛比，噚日入唔到，根本只係「塞翁失Put，焉知非福」。
今朝未起身就電話響，原來係台嘅同事WhatsApp嚟話美國加息0.25厘，不過呢個消息對market嚟講同「太陽底下無新事」係無乜分別；依家10點5分，戰友Jack喺泰國返港復工第二日就WhatsApp我話滙豐或宣布加息，呢單嘢跟美國加都係預咗，再唔加銀行真係食豆，你見恒生銀行(00011)今日裂口彈升成3%有多就知道「開飯啦」。
依家10點13分，恒指點數變動不大，日線圖仲見暫時出現咗粒「T星」，呢個情況就試吓向估股埋手啦，坦白講，就算輪證場上有幾多新出嘅underlying都好，來來去去嘅都係得嗰三數隻，所以要從個股輪證入手嘅話，大家只要睇吓幾乎個個人個stock list都有嗰幾隻股票就可以架啦。
今日捉到嘅就係中國平安(02318)，消息/新聞上佢係無事無幹架，不過日線圖見佢14RSI上到69.367，而SlowSTC(14,3)嘅%K線(87.332)高位跌穿%D線(87.808)，換埋條保歷加通道出嚟嘅話，就見平保最近六個交易日裏面有五日係升穿咗個保歷加通道頂，雖則保歷加通道口拓闊中，之但係見下方技術分析都有超買準備回落嚟講，回一回都真係在所難免。
正當想揀隻平保Put/熊之時，隔離TEAM同事走晒過嚟咁滯，原來有同事個C字頭牌子嘅DVD機爆炸，個陣燶味真係好強，保安叔叔上嚟之後就拎住個垃圾筒掃個爆炸嘅DVD機落垃圾桶，再行去後樓梯度should be用咗一大支滅火筒怒噴，平安熊(64620)，收回價84.08，同現價有逾5%距離，小注吼分鐘圖超買落場...唔得啦，要疏散一陣啦。
作者阿珊，從事財經及投資版報道超過10年，由平面媒體走到網絡世界，《鐘擺戰略贏港股》作者。相信技術分析，由窩輪到牛熊證無一不炒，唔貪心，志在搵餐下午茶。
電郵：[email protected]；Weibo：#Gladyshan
