熱門:

2018年9月20日 即巿股評 港股直擊

【盤房來料】中資金融股短線跑贏大市

隔晚美股再向上推進,但只限於道指跟納指,道指再升逾百點,標指亦錄得進賬,兩者距離歷史高位相差不足1%,只要呢幾日風平浪靜,「侵侵」唔好又忽然出嚟搞事,估計兩大指數再創新高機會極大。尤其係美股明晚係三重期結算,再加埋季度結算,估計美股即使唔創新高,亦頂得幾吓頭鎚,暫時跌唔落。由於下周聯儲局議息,加息已無懸念,隔晚金融股全線向上,但科技股則有些少發軟蹄,構成道指升,納指跌呢個畫面。

至於港股隔晚夜期跟ADR偷步衝上27600水平,造就今早恒指高開198點報27605,開市已上破20日線(27407點),但半日最高亦只係27628。喺內地股市乏力再升之下,港股亦能企穩高位,更掉頭倒跌25點,低見27382點。其後恒指喺20日線附近爭持,中午收報27400,微跌6點;國企指數跑贏恒指,半日升24點報10766點。

連日回購嘅騰訊(00700),累計回購金額相對市值有限,未能帶領股價一飛沖天,昔日大市火車頭,自第一季被大股東減持後,已淪落為蝸牛,再無過往領軍向上嘅動力。半日最高見329元,喺20日線前有阻力,目前仍守320元,但高開低走,暫時走勢有啲濕滯。至於另一重磅股大笨象(00005),受惠加息股價今日再升,暫時仍站穩喺20日線之上,北水連日掃貨,未知喺北水支持下,能否向70元反彈目標進發。中資金融股相對表現唔錯,缸湖傳聞人行隨時準備再降準,為市場提供足夠流動性,博反彈已買入,暫時可以坐多一陣。內險股亦見上升,但要留意近日較強勢嘅平保(02318),今日又係高開低走,即使仍錄得升幅,但日線圖今日出現陰燭的話要小心。

醫藥股如其名弱過藥煲,新貴中生製藥(01177)急彈兩日又回吐,半日跌逾2%,係表現最差藍籌股,其他醫藥股普下跌,暫時唔需要對呢個板塊有所留戀。紐約期油創兩個月高位,三桶油不升反跌,皆因資金流向炒中小型油服股,講咗N次石油股不宜高追,即使睇好油價後市走勢,亦只能吼回吐時吸納。

第二隻同股不同權股美團點評(03690),雷聲唔大,雨點亦小,今日首日掛牌,開市價72.9元,較招股價升5.7%,今日都算係熱炒股,可惜幅度唔多夠走位,有參與炒作,睇住招股價69元不能失守,跌穿招股價或會引發孖展認購嘅沽盤,入場炒作自己執生。

半日大市走勢唔多精神,預計唔少淡友又會蠢蠢欲動,但阿Man則認為暫時咪衝動開淡倉,唔排除午後A股回勇,午後挾淡倉一再重演。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads