「侵侵」終於宣布由下星期一開始，落實向2000億美元中國進口商品徵收10%關稅，並喺明年1月1日開始將有關稅率調高至25%，同時揚言中國還拖的話，再向中國2670億美元中國商品額外開徵關稅，令中美貿易戰再度升級。消息一出，美股已率先腳軟，但人家一直係呢場貿易戰主導者，加上暫時中國似乎苦無對策，中港兩地股市所受沖擊當然較美股更大。
恒指低開86點，報26846點已經係半日高位，喺A股腳軟下，港股開市冇耐就落到26648點半日低位，其後A股曾倒升，令港股跌幅收窄，但A股未幾又回復弱勢，令港股跌幅欲彈難彈。恒指半日跌200點，報收26732點；國指則跌30點，報收10431點。
隔晚美股以科技股最為弱勢，港股嘅科技龍頭騰訊(00700)亦腳軟，半日跌逾2%，報收312.4元，接近半日低位311元，連續多日回購亦無法令股價起死回生，其跌幅已拖低大市51點。至於手機設備股，受蘋果新款手機銷量不及預期，蘋果隔晚下跌2%，手機設備股全線下滑，舜宇(02382)跌3.2%，瑞聲(02018)亦跌1.9%。
其他藍籌股普遍走軟，友邦(01299)跟大笨象(00005)齊齊跌0.36%，工行(01398)跟建行(00939)亦齊齊下跌。油價略為回落，三桶油分別跌0.3%至0.7%。山竹影響下澳門賭場侷住收檔兩日，為咗應付將來再發生呢個情況，澳門可能授權特首可於緊急情況下，暫停賭場營業，大行當然調低濠賭股收入，股價本來已連日受壓，今日跌勢持續，金沙中國(01928)半日跌2.8%；銀河娛樂(00027)跌0.5%。永利澳門(01128)、新濠國際(00200)、澳博(00880)及美高梅中國(02282)跌1.7%至2.3%。
本地電訊股一升再升，但阿Man都唔建議追貨，雖然大摩話香港流動電訊價格戰已結束，隨着香港電訊宣布加價，相信同行亦會跟隨，只係香港嘅電訊市場有幾大，值唔值得膠追，大家心中有數。本地電訊股表現理想之外，內地水泥股因為水泥價格上升，水泥股表現亦突出，只係水泥股之前亦試過急升後迅速回落，咁飄忽嘅走勢，連最貼市嘅炒鬼亦未必追得上。
總括嚟講港股仍然處於熊市之中，即使有反彈，亦可能只係過眼雲煙，至於今次大市由26200水平反彈至上周五嘅27200-27300又回頭，反彈係咪結束暫未肯定，但可以肯定係，港股早已形成一浪低於一浪嘅格局，博反彈只能適可而止。
麥狄文
(徐狄怡‧證監會持牌人)
