噚日喺下半part時睇返隻滙豐控股(00005),見個市上返去時,滙控個股價都上返「7」字頭,滙豐Call(24987)亦可隨時落鑊;只不過係下晝時段拆滙控5分鐘嘅話,見住啲技術指標上晒去咁,確係搵唔到個位落場。
唔緊要,「唔係你財,唔入你袋」嘛,所以噚日亦都喺下半part點名講將會喺今個星期五(8月24日)公布業績嘅友邦保險(01299)。噚日下晝3點40分友邦5分鐘圖SlowSTC(14,3)見到嚴重超賣,呢個時候就係入Call/牛證嘅好時機,今日趁開市無耐恒指高開市,友邦曾升逾2%,呢個時候(大約係今朝早9點45至50分呢段時間)見5分鐘圖SlowSTC(14,3)由噚日嘅嚴重超賣彈到上當時嘅嚴重超買,完美演繹咗一次鐘擺。
依家10點5分,大市由升轉跌,友邦升幅亦都收窄咗,拆開5分鐘圖見到友邦回落到現水平只為中軸位置,若大市再繼續下行嘅話,話唔定友邦分鐘圖再現多次嚴重超賣,到時又可以再入多次Call/牛證。
睇返個市,依家10點9分,恒指做緊27580點,跌17點,開恒指牛熊證街貨圖,上方熊證最貼嘅喺27800至27899點,現價反彈319點就可以食到呢度嗰301張期指;下方最貼價牛證26800至26899點,現價繼續下行多780點就可以食到呢2034張期指。又係一個兩難局面:上方點數少但期指都少;下方期指多但點數好很遠。唔通暗示我知都係繼續喺個股搵食?
呢期應該有唔少人討論隻中國移動(00941),「藍燈籠」連升五日後,今日終見一支大陰燭,日線圖見SlowSTC(14,3)%K線高位插穿%D線,而14RSI由噚日高見72.2落到依家(10點15分)嘅63.09,好係一個Put樣,只可惜中移Put/熊市場上選擇有限,中移Put(25425),行使價$68.68,屬高槓桿、低引伸之選。
本來仲想講埋隻舜宇光學(02382),但一搵之下啲Call輪都真係怪怪地。炒輪嘅好多時都會遇到呢啲情況:就算睇中市但都未必有合適嘅工具比你落場。Well,舜宇被份中期業績一個大裂口打落去之後,低殘過後始有翻身之日,而佢就係開始有呢個跡象啦。
BTW,聽日同我婆婆去睇醫生,AL一日,【輪證贏家】亦停稿一日,抱歉。
作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#