熱門:

2018年8月17日 港股直擊 即巿股評

【輪證贏家】滙豐Call追落後

今日落大雨,但初初細雨時喺屋企隔住隻窗睇得唔係好清,街又無人行過(行過嘅話可以睇吓佢有無撐傘嘛),之後我問我家老爺:出面係咪落雨呀?點都估唔到佢比我個答案係:你未見過落雨咩?鄉下妹~有少少火起嘅同時,更多嘅係被激死嘅感覺。

依家9點55分,鄉下妹返到公司睇市,經過噚日朝早一輪「護駕」之後,騰訊(00700)跌幅收窄,恒指亦被搶高返上去,今日報價機一片青草地咁,似乎個世界又回復平靜。

日線圖上恒指今日再見陽燭,不過暫時見到嘅係一支實心嘅高開低收嘅陽燭,對好友嚟講有啲喜訊嘅係日線圖上SlowSTC(14,3)%K線(13.08)低位升穿%D(12.63),而14RSI亦見回升。換條保歷加通道出嚟睇,今日保歷加通道口雖然繼續拓闊,但承如之前所講當粒燭跌出保歷加通道以外範圍時,最後出軌多兩三日,必定會彈返入保歷加通道裡面,今日一彈就係最好證明;BTW,噚日確係得太殘同over react了。

依家10點1分,恒指做緊27282點,升182點,用呢口價嚟計數,開埋恒指牛熊證街貨圖睇,下方牛證經過一輪大屠殺之後,依家最貼價嘅係26800至26899點,呢度有相當於1689張期指,如果個市由依家開無啦啦向下跳481點嘅話,就可以全數食晒呢堆街貨;相反,向上彈多717點嘅話,就可以食到上方第一梯隊嘅熊證街貨,嗰位係27900至27999點,呢度有相當於667張期指。

係嘅,咁計嘅話下行點數近同期指張數多,殺落去係啱嘅;但當恒指波幅指數(VHSI)有高位回落嘅跡象時,就會諗到點數上短期內難有大嘅波動。預期要咁博,倒不如吼隻個股追落後。

好似呢隻咁,都係動物嚟嘅,係啦,就係大象滙控(00005)啦,噚日被大市大插所拖累生咗粒「倒轉錘頭」出嚟,今朝升又唔係升得好多,個裂口($70.5至$71.5)雞乸咁大個仲係度,最正就係日線圖上SlowSTC(14,3)%K線(4.765)同%D線(6.097)得返個位數,保歷加通道嚟講佢今日都只係剛好貼價個底($70.28),如果大市真係大插一輪之後要搵啲股份幫手推返高,滙控仲唔係吳孟達嗌嘅「阿星,接力」嗰隻?!今日星期五吼到位入都未必好事,你知呢期美國嗰邊好興突然間twitter一講之後,成個世界會唔同晒架嘛,滙豐Call(24987),行使價71.93元,喺大約價外2%嘅call輪之中,屬高槓桿、低引伸。但記住唔心急,因為日線圖嘅SlowSTC(14,3)絕對可以出現超賣再超賣,%K線同%D線係有權兩個數值都係「零」架!

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo:#Gladyshan

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads