|
熱門:

2018年8月13日 即巿股評 港股直擊

【輪證贏家】恒指熊伸多一腳

上個星期五(8月10日)嘅恒指牛(68263)或恒指牛(57598),好彩喺下晝見個市有啲唔對路之下,抱住一個唔貪心嘅心態即刻走人,都係嗰句:作為老散嘅我哋,有得揀,就梗係寧願賺$1好過輸$1呀!

今朝坐緊巴士時,同戰友Jack分享我新砌好副puzzle時,就收到台一個message:恒指低開409點,失守28000點;到搭正開市再開app睇,成版「我的股票」滿缸紅不在話下,星期三(15日)業績嘅騰訊(00700)又無咗$370;最大鑊嘅都係東亞(00023)幾十年藍籌地位無咗不得止,仲有撞着冧市,依家9點52分,東亞跌緊6.7%。不過,諗返起上個好似有睇過條恒指波幅指數(VHSI)話個市可能就嚟有一個巨浪(唔係薯片呀!)出現,搵返先知原來係上星期三(9日)講嘅;係囉,下次都係搵張紙寫底貼喺個電腦隔離提醒自已先,真係年紀大啦。

係嘅,古語有云:有危就有機嘅。依家9點54,恒指報27928點,跌438點。再開埋恒指牛熊證街貨圖睇吓有無機先啦。上方最貼價嘅熊證街貨係28700至28799點,呢度有相當於799張期指,唔計佢重唔重貨住,同現價比,唔好話要食晒,行去門口㩒鐘仔都要由現價反彈上772點先可以。

至於下方嘅牛證,暫時最低見過27878點計,最貼價嗰三part牛證已經全數被打靶,變相依家最貼價嘅係27800至27899點,呢度有417張期指,同上方嘅熊證比呢一層嘅街貨量真係唔算得係啲乜,但勝在近,都入晒屋囉。依家10點正,恒指跌夠500點,再創今日新低,不過講緊都係278XX點呢個範圍裏面,換言之所謂嘅最最貼27800至27899點裏面都死咗一半貨滯,難道個市嘅目標係27500至27599點嗰1102張期指嘅重貨區?

日線圖上恒指今日個裂口真係大得驚人,下方技術指標都由之前嘅看好變看淡,戰友Jack話見到個市跌500點好心動,但當見到現水平處於保歷加下降通道嘅中,而且咁大抽牛證街貨喺度,都係等一等好啲。不過,恒指熊(57966),收回價28400點,槓桿偏高、低街貨、成交活躍,不妨小注。

作者阿珊,從事財經及投資版報道超過10年,由平面媒體走到網絡世界,《鐘擺戰略贏港股》作者。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected];Weibo:#Gladyshan

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。